Tribunál aplika TIR ba João Martins inklui kargu xefia UNTL na’in-lima
DILI, 17 Janeiru 2026 (TATOLI)–Tribunál Judisiál Primeira Instánsia Dili (TJPID) liuhusi Juíz Titulár Argentino Nunes hasai despaisu hodi aplika medida koasaun Aprezenta Períodika (AP) no Termu Identidade Rezisténsia (TIR) ba atuál Reitór Universidade de Timor-Leste (UNTL), João Martins, enkuantu arguidu na’in-lima seluk hanesan FQdC ,TS, MB, JMM no LSdA aplika de’it TIR.
Nune’e, bazeia ba medida koasaun AP, João Martins iha obrigasaun aprezenta-an kada fulan dala-ida.
Hafoin despaisu husi Tribunál, Advogadu Privadu, Arlindo Sanches deklara katak, nia kliente hanesan atuál Dekanu hetan medida TIR.
“Ha’u-nia kliente hetan medida TIR, tanba ne’e ha’u mós aseita ho medida ne’e,” Advogadu Privadu, Arlindo Sanches, hato’o ba Jornalista sira iha Tribunál, Kolmera, Sábadu ne’e.
Notísia relevante : PNTL detein Reitór no Vise UNTL inklui kargu xefia na’in-haat seluk
Nune’e mós, Advogadu Privadu, Napoleão de Olivera Carvalho, hateten, nia parte fó asisténsia ba asistidu na’in-rua, ne’ebé ikus mai hetan hotu medida TIR.
“Asistidu na’in-rua ne’ebé ha’u fó asisténsia ba ne’e mak Dekanu maibé foin lalais baixa hela iha ospitál, sira hetan TIR hotu. Ha’u hanoin desizaun ne’e adekuadu,” nia katak.
Defensór Públiku, Angelmo Akara, deklara katak, nia asistidu mós hetan medida TIR, tanba ne’e nia parte konkorda ho despaisu Tribunál nian.
Nia konsidera katak medida koasaun ne’ebé Tribunál fó ba nia asistidu ne’e adekuadu tanba krime ne’ebé Ministériu Públiku imputa ba nia asistidu ne’e krime Pekulatu.
“Hafoin Tribunál haree ho defeza ninian fundamenta la priense ba rekezitu krime Pekulatu, ne’ebé Ministeriu Públiku imputa ba sira,” nia haktuir.
Antes ne’e, Diresaun Servisu Investigasaun Kriminál Nasionál (DSIKN) ezekuta mandadu judisiál ho NUC 086/25-PNSIK, hodi halo buska, apreensaun no detensaun ne’e tanba Reitór UNTL, João Martins no Vise-Reitór inklui kargu xefia na’in-haat tanba interveniente sira presumível ba krime falsifikasaun dokumentu ka notasaun téknika ne’ebé akontese iha tinan 2024. Violasaun ne’e previstu iha artigu 303 husi kódigu penál Timor-Leste nian.
Jornalista : Natalino Costa
Editora : Julia Chatarina
