DILI, 18 Janeiru 2026 (TATOLI)—Xefe Estadu Maiór Jenerál Forsa Armada (XEMGFA), Tenente Jenerál Domingos Raul Falur Rate Laek husu ba membru Unidade Polísia Militár sira atu tane a’as disiplina profisionalizmu hodi bele sai ezemplu ba Militár sira seluk.
Nia dehan, Polísia Militár nia misaun iha ligasaun ho Forsa Armada nia siénsia autoridade morál, liuhusi asaun sira tenke hametin padraun a’as kona-ba disiplina, prontidaun no kapasidade operasionál.
“Disiplina mak fundasaun ne’ebé desizivu hodi harii klima konfiansa, estabilidade no seguransa ne’ebé mak populasaun sira haree,” Tenente Jenerál Falur hateten durante halo intervensaun iha aniversáriu Polísia Militár ba dala-21 no Patronu Polísia Militár Komandante Venâncio Feraz ba dala-2, ne’ebé hala’o Kuartel Unidade Polísia Militár Kintál Boot, Domingu ne’e.
Notísia relevante : Falur kompromete fó atensaun ba Polísia Militár
Biban ne’e Falur husu ba Polísia Militár sira atu sai espellu ba membru Forsa Armada sira seluk.
“Saida mak ezije ba imi, imi tenke sai espellu, Militár ida-ne’ebé disiplinadu, edukadu no respeitadu. Profisionál ida-ne’ebé franku no leál ho sentidu misaun no dever ne’ebé a’as, aumenta espíritu no sakrifísiu ne’ebé boot tebes inklui vontade atu serví ho di’ak,” nia akresenta.
Falur konsidera, selebrasaun ne’e hanesan momentu afirmasaun ba maturidade unidade, haree ba dalan ne’ebé la’o ona no esforsu atu dezenvolve kapasidade rekursu umanu.
Nune’e, FALINTIL-Forsa Defeza Timor-Leste (F-FDTL) liuliu Unidade Polísia Militár presiza halo investimentu iha kapitál umanu hodi akompaña ho kompromísiu metin atu hadi’a rekursu materiál no infrastrutura sira.
Iha sorin seluk, Tenente Jenerál sente iha nesesidade atu kontinua halo konsolidasaun ba Polísia Militár nu’udar unidade referénsia la’ós de’it F-FDTL maibé mós instituisaun sira seluk ne’ebé iha relasaun ka serbisu hamutuk.
Hahú formasaun iha tinan 2005
Iha fatin hanesan, Komandante Polísia Militár, Tenente Koronél Graduadu Mateus de Jesus, haktuir, Unidade Polisia Militár hahú nia formasaun iha tinan 2005 ho efetivu pelataun ida ne’ebé koñesidu ho naran ‘Maubere Um’, ne’ebé iha momentu ne’ebá Unidade Polísia Militár seidauk iha estatutu própriu.
Polísia Militár estabelese hahú iha loron 08 Novembru 2006 bazeia ba artigu 12 númeru 4 Dekretu-Lei númeru 15/2006, Polísia Militár legalmente kria no integra iha F-FDTL.
Iha loron 09 Setembru, tuir Dekretu-Lei númeru 26/2009, Unidade Polísia Militár hetan estatutu verbáliku ho dependénsia ho Xefe Estadu Maiór Jenerál Forsa Armada atu asegura orden no disiplina interna iha instituisaun F-FDTL no tuir despaisu Xefe Estadu Maior Jenerál Forsa Armada iha tinan 2023 katak área administrasaun, treinamentu no lojístiku Unidade Polísia Militár sempre submete ba komponente terrestre.
Komandante esplika, Polísia Militár asume papél estratéjiku ida guardia disiplina legalidade no Autoridade Militár sempre tuir prinsípiu Konstituisaun lei no regulamentu ne’ebé vigór.
Nia dehan, estatutu orgániku define klaru katak atividade Polísia Militár bazeia ba legalidade proporsionalidade respeitu ba dignidade umanu ho utilizasaun forsa hanesan últimu rekursu.
“Prinsípiu sira ne’e mak fó lejitimidade ba ita-nia asaun hodi hametin ita-nia konfiansa ba públiku hanesan Forsa Defeza Timor-Leste,” Tenente Koronél, katak.
Tuir Komandante ne’e katak, Polísia Militár la’ós de’it responsável ba prevensaun no hapara infrasaun displinar Militár, maibé iha kompétensia atu garante instalasaun Militár halo investigasaun kriminál ba forru Militár, apoiu operasaun Militár, inklui kolabora ho autoridade sivíl iha situasaun krize hodi halo serbisu ne’ebé dignu.
“Polísia Militár tenke iha kódigu kondukta no disiplina a’as liu no tenke sai hanesan ezemplu ba Militár hotu, ba Forsa Defeza Timor-Leste ne’e mak responsabilidade morál ne’ebé labele ita haluhan,” nia tenik.
Iha sorin seluk, formasaun no treinamentu sira kontinua sai hanesan Militár sira-nia prioridade ne’ebe tenke iha koñesimentu legál, kapasidade investigasaun integridade morál no komportamentu ezemplár. Kontinua mós halo kapasitasaun no área administrasaun.
Nia dehan, selebrasaun ne’e la’ós de’it atu festeza maibé selebra fali pasadu no esperiénsia sira ne’ebé liu.
“Ha’u fó parabéns ba membru Unidade Polísia Militár sira hotu. Ha’u mós apela nafatin ba membru sira nafatin fiar malu iha futuru serbisu hamutuk ekipa ida, ho ida-ne’e unidade sai nafatin forte no fiel ba Konstitusaun no lei, tuir estatutu Militár,” nia enkoraja.
Jornalista : Natalino Costa
Editora : Julia Chatarina
