Funsionáriu administrasaun Vikeke na’in-13 reforma ona
VIKEKE, 19 Janeiru 2026 (TATOLI)—Diretór Servisu Rekursu Umanu Munisípiu Vikeke, Luís Amaral informa funsionáriu husi Administrasaun Munisípiu Vikeke hamutuk na’in-13 ne’ebé naran tama iha lista reforma obrigatória agora daudaun reforma ona.
“Ita-nia funsionáriu husi Munisípiu Vikeke hamutuk na’in-13 ne’ebé tama ba reforma ne’e, iha fulan-Janeiru sira la tama ona servisu tanba sira reforma ona. Nune’e, agora ita menus ona funsionáriu,” Luís Amaral ba TATOLI iha Postu Vikeke Vila, Segunda ne’e.
Luís hatutan reforma obrigatória ne’e la’ós ba administrasaun Munisípiu Vikeke de’it, maibé ba mós funsionáriu servisu edukasaun no saúde sira-ne’ebé idade 65 ba leten ona.
“Reforma ne’e ba hotu instituisaun sira-ne’ebé mak funsionáriu idade 65. Funsionáriu ne’ebé kontinua servisu ne’e mak sira-ne’ebé asumi kargu sira, maibé ida la’ós asumi kargu ruma ne’e reforma hotu,” nia tenik.
Tuir nia, daudaun ne’e Servisu Rekursu Umanu Munisípiu Vikeke halo planu ba rekrutamentu funisionáriu hodi substitui fali fusionáriu sira-ne’ebé reforma ona.
“Ami iha ona planu ba rekrutamentu, maibé ami sei hein karta ne’ebé foin lalais haruka bá Komisaun Funsaun Públika (KPF). Bainhira hetan ona aprovasaun mak foin implementa rekrutamentu,” Luís haktuir.
Entretantu, funsionáriu ne’ebé reforma ona iha administrasaun Munisípiu Vikeke iha na’in-13, Servisu Saúde Munisípiu Vikeke na’in-19 no Servisu Edukasaun Munisípiu Vikeke hamutuk na’in-202.
Jornalista: Vitorino Lopes da Costa
Editór: Xisto Freitas da Piedade
