DILI, 19 Janeiru 2026 (TATOLI)—Komandu Polísia Nasionál Timor-Leste (PNTL) rejista Postu Administrativu Dom Aleixo hanesan zona ne’ebé risku liu ba konflitu.
“Daudaun iha Natál no Tinan Foun ne’e situasaun Dili iha hakmatek nia laran, maibé iha konfrontu ki’ik mosu. Tuir ami-nia haree kompara ho Postu Administrativu sira iha Dili, zona ne’ebé konfrontu mosu barak ne’e mak Dom Aleixo,” Komandante PNTL Munisípiu Dili, Superintendente Xefe Polísia Orlando Gomes, hato’o ba Jornalista sira iha ninia knaar fatin, Eskuadra Dom Aleixo, Segunda ne’e.
Nune’e, Komandu Munisípiu Dili kontinua intensifika operasaun la’o ain tama no sa bairru iha tempu kalan no kontinua hamutuk ho Autoridade Lokál iha área risku ba konflitu hodi haalo diálogu ho komunidade suku nune’e bele halo prevensaun ba krime.
“Ami sei reativa fila diálogu komunitáriu nune’e ho objetivu ida katak bele bolu inan aman sira, joven sira iha suku, aldeia no bairru sira atu fó hanoin ba sira atu prevene krime, tanba krime ne’e la’ós de’it estraga ita-nia aman maibé mós ba ita-nia futuru. Tanba ne’e, ita presiza prevene no joven sira presiza hakribi ida-ne’e,” nia akresenta.
Notísia relevante : PCIC-POLRI formaliza akordu kooperasaun ba prevensaun krime tranznasionál
Komandante aprofunda, Komandu Munisípiu Dili sei realiza diálogu ba estudante sira iha nível eskolár pré-sekundária no sekundária, tanba dalabarak iha área Dom Aleixo mosu konfrontu entre estudante sira.
“Ita haree dalabarak mós iha área iha eskola balun tuda malu beibeik, entaun ita mós hanoin ona tinan ne’e ita kontinua halo diálogu ba eskola sira ne’e, nune’e estudante sira bele iha konsiénsia katak buat ida krime ne’e la’ós ona tempu, maibé ida tempu ba sira estuda,” nia katak.
Nune’e, Komandante ne’e apela ba joven no estudante sira atu harii dame hodi garante sosiedade nia hakmatek.
“Ha’u husu ba joven sira, tempu ida agora ne’e prevene krime hodi kria hakmatek iha sosiedade nia le’et, papél joven mak ne’e,” nia tenik.
Jornalista : Natalino Costa
Editora : Julia Chatarina
