VIKEKE, 20 Janeiru 2026 (TATOLI)–Diretór Servisu Saúde Munisípiu Vikeke, Aljaksono Soares Maia informa parseiru dezenvolvimentu Asian Development Bank (ADB) aprova ona fundu hamutuk dolar amerikanu millaun tolu (3) atu konstrui Ospitál Munisipál Vikeke.
“Daudaun ne’e parseiru ADB aprova ona orsamentu hamutuk millaun tolu atu konstrui ospitál iha tinan 2026. Nune’e, agora parte ADB halo hela konsulta téknika modelu konstrusaun ospitál nian ba parte autoridade lokál sira no Servisu Saúde Munisípiu Vikeke,” Aljaksono ba TATOLI iha Postu Vikeke Vila, Tersa ne’e.
Diretór Servisu Saúde ne’e subliña orsamentu ne’e sei konstrui sala emerjénsia, sala sirúrjia no seluk tan.
“Prosesu konstrusaun ne’e Ministériu Obra Públika sei lori bá Ajénsia Dezenvolvimentu Nasionál (ADN) hodi submete ba prosesa konkursu. Bainhira prosesu sira-ne’e konklui ona ita sei halo lansamentu. Kle’ur liu iha fulan-Outubru ne’e,” nia hato’o.
Tuir nia katak konstrusaun ospitál munisipál ne’e importante tanba bele redús númeru transferénsia moras ba nasionál, redús gastu sira entre Governu no família sira husi pasiente.
Kona-ba rai ba konstrusaun Ospitál Munisipál Vikeke nian, antes ne’e komunidade entrega ona ba Ministériu Saúde liuhusi Autoridade Munisipál Vikeke iha tinan 2025 ho medida 200 × 100, lokaliza iha área Manuwe-Matan, Kaiboki Mane-Ki’ik, Aldeia Mane-Haat, Suku Karaubalu, Postu Vikeke Vila.
Entretantu, konstrusaun ospitál munisipál sei benefísia populasaun Vikeke ho totál hamutuk 80.176 kompostu husi mane 40.363 no feto hamutuk 39.813, ho totál uma-kain 16.563.
Jornalista: Vitorino Lopes da Costa
Editór: Xisto Freitas da Piedade
