DILI, 20 Janeiru 2026 (TATOLI)—Administrasaun Aeroportu no Navegasaun Aérea Timor-Leste, Empreza Públika (ANATL, E.P, sigla portugés) kontribui reseita millaun $3-resin ba kofre Estadu iha tinan 2025.
Prezidente Administrasaun Aeroportu no Navegasaun Aérea, Romualdo António Soares, hateten reseita ba tinan 2025 nian sa’e uitoan kompara ho tinan 2023 no 2024, ne’e hatudu katak reseita hirak ne’e kobre husi kategória no operasaun servisu ne’ebé mak iha aeroportu nian.
“Fiar katak ba oin ita-nia reseita bele sa’e tan ho operasaun servisu balun ne’ebé mak ita moderniza ona hanesan terminál departure, tarifa estasionamentu inklui ho estimativa aviaun no voo aumenta tanba landing feet ho airport task aumenta,” Romualdo António Soares informa ba Agência Tatoli iha nia kna]ar fatin, Komoro, ohin.
Nia afirma, maske iha obstákulu ba operasaun servisu iha aeroportu maibé sira tenke komunika no koordena malu ho ajénsia inklui parséria sira-ne’ebé servisu mós iha aeroportu laran hodi minimiza obstákulu ne’ebé iha no garante voo tama sai ho seguru.
Entretantu, reseita ne’ebé ANATL rekolla husi fonte kategória rua mak tarifa aeronautikas $2.086.055.50 ne’ebé kompostu husi tarifa aterragein $927.045,00, tarifa pasajeiru internasionál $738.450,00, tarifa utilizasaun balkaun check in $99.261,66, tarifa estasionamentu aeronaves $94.970,00, tarifa seguransa voo internasionál $187.887,11, tarifa asisténsia kombustível $33.985.43, tarifa assisténsia restaurante $4.456.30.
Enkuantu iha kategória daruak nian mak tarifa naun-aeronautikas hamutuk $1.552.822,10, ne’ebé kompostu husi tarifa okupasaun espasu área hamutuk $584.942,71, tarifa publisidade $99.387,37 tarifa kartaun asesu $35.960,00, tarifa estasionamentu veíkulu $291.148.43 no outru reseita naun aeronauticas hamutuk $541.383,59.
Jornalista : Alexandra da Costa
Editór : Cancio Ximenes
