DILI, 20 Janeiru 2026 (TATOLI) – Autoridade Nasionál Petróleu (ANP) emite sertifikadu apresisaun ba formadu na’in-10 iha área soldadura nian. Formandu sira ne’e tuir formasaun durante semana ida-resin, iha Sentru Nasionál Empregu no Formasaun Profisionál (CNEFP) Tíbar.
Jerente Jerál Konteúdu Lokál husi ANP, Estanislau Martins, hateten programa ida-ne’e hetan apoiu husi Timor-Leste Australia Energy Partnership (TLAEP). TLAEP nu’udar esforsu kolaborativu ida ne’ebé lidera husi Departamentu Indústria, Siénsia no Rekursu Governu Austrália nian no Autoridade Nasionál Petróleu.
Nia esplika katak formasaun soldadura ida-ne’e nu’udar dezeña ida atu eleva edukasaun vokasionál iha Timor-Leste nia setór enerjétiku.
Tuir nia, formasaun ne’e CNEFP Tíbar, hahu iha loron 13 Outubru to’o 27 Novembru 2025, ne’ebé marka hakat signifikativu ida hodi hametin forsa traballu lokál.
Formadu na’in-10 ne’ebé partisipa formasaun ne’e mak formadór kualifikadu husi universidade no sentru formasaun profisionál, ne’ebé hetan akreditasaun husi Institutu Nasionál ba Dezenvolvimentu Forsa Traballu (INDMO).
Formasaun ne’ebé partisiante sira hetan mak kona-ba fornese instrusaun soldadura vokasionál ho kualidade aas. Esforsu ida-ne’e importante tebes hodi fó kbiit ba formadór sira atu fó sai sertifikadu soldadura nian ne’ebé rekoñesidu internasionalmente, nune’e haburas forsa traballu ida ne’ebé iha abilidade no kompetitivu ne’ebé bele avansa projetu sira infraestrutura enerjétiku Timor-Leste nian.
Durante semana ida-resin, iha semana dahuluk, formandu sira halo sesaun prátika sira ne’ebé ekipa formadór sira atu sertifika soldadór-sira tuir padraun AS/NZS ISO 9606.
Semana daruak, sira aprende kona-ba teoria pré-rekizitu ida ne’ebé kulmina iha ezame eskrita ida ne’ebé importante tebes ba progresaun ba kursu IWI-B. Semana datoluk aprende kona-ba inspesaun intensivu ida ne’ebé envolve avaliasaun teórika no prátika.
Iha fatin hanesan Formadór Prinsipál ba Teknolojia Soldadura husi Weld Austrália, Joseph Sandor, apresia formandu sira tanba iha vontade tomak aprende kona-ba soldadura nian.
Nia dehan iha kolaborasaun ho CNEFP Tíbar no INDMO, TLAEP komprometidu atu haforsa Timor-Leste nia forsa traballu, hasa’e formadór lokál sira-nia kapasidade, no dezenvolve forsa traballu kualifikadu neʼebé tuir padraun internasional, nune’e hasa’e Timor-Leste nia kompetitividade iha merkadu enerjétiku globál.
Parseria Enerjétika Timor-Leste Austrália dedikadu atu haburas esforsu kolaborativu entre Timor-Leste no Austrália hodi hasa’e setór enerjia liuhousi formasaun inovadora no inisiativa kapasitasaun.
Parseria Enerjétika Timor-Leste Austrália (TLAEP) lidera husi Departamentu Indústria, Siénsia no Rekursu (DISR) Austrália nian no Autoridade Nasional Petróleu (ANP) Timor-Leste nian. Parseria ne’e estabelese iha tinan 2022 hodi aprofunda ligasaun koñesimentu, komérsiu no investimentu entre Timor-Leste no Austrália iha setór rekursu sira.
Parseria ne’e apoia negósiu, instituisaun no vizita delegadu Governu entre Timor-Leste no Austrália hodi fahe koñesimentu, harii ligasaun indústria, hametin relasaun negósiu no akadémika; no harii kapasidade forsa traballu iha setór rekursu Timor-Leste nian.
Parseria ne’e iha dalan haat mak Governu ba Govemu, Formasaun ba Formadór sira, Negósiu no Akademia.
Tékniku Espesialista ba Promosaun Abilidade iha INDIMO, Amándio Belo, hato’o gratidaun boot ba dedikasaun ba formandu na’in-10 ne’ebé ramata ona sira-nia formasaun.
“Ita-nia prezensa iha ne’e, husi instituisaun ne’ebé la hanesan, maibé sai hanesan sasin ba ita-nia objetivu komú harii kualifikasaun rekursu umanu ne’ebé forte hodi sustenta dezenvolvimentu nasionál”, dehan.
Tuir nia, INDMO hanesan órgaun ne’ebé iha responsabilidade ba garantia kualidade formasaun vokasionál iha Timor-Leste, iha kompromisu firme hodi sai parseiru estratéjiku iha dezenvolvimentu setór enerjia.
“Mai ita kontinua serbisu hamutuk, komprometidu ba inovasaun no kualidade, hodi prepara jerasaun foun neʼebé sei lidera Timor-Leste ba futuru ne’ebé naroman, prósperu, no sustentavel”, dehan.
Formandu husi Sentru Formasaun Profisionál Dom Bosco Komoro, Nelson Soares, hateten durante ne’e aprende teoria no prátika di’ak tebes husi formadór. “Ami hanoin katak ida-ne’e oportunidade di’ak tebes ba ita iha fituru nian. Buat ne’ebé ami aprende iha ne’e ami sei bá aplika iha ami-nia sentru formasaun”, nia garante.
Jornalista: Arminda Fonseca
Editora: Maria Auxiliadora
