Autoridade Kovalima rekolla reseita rihun $34-resin ba kofre Estadu
KOVALIMA, 20 Janeiru 2026 (TATOLI) – Autoridade Munisípiu Kovalima ne’ebé lidera husi Prezidente Autoridade Kovalima, Miguel Armada Cardoso, hahú 2022 to’o 2025 ne’e kontribui ona reseita $34,061.78 ba kofre Estadu.
“Ami kontribui reseita doméstika hahú 2022 to’o iha 2025 mai husi loke feira, aluga salaun postu administrativu Suai, aluga Salaun administrasaun munisípiu Kovalima ba ema seluk uza no selu, dokumentu aprovizionamentu no publisidade husi Servisu Munisipál Jestaun Merkadu no Turizmu (SMGMT)”, Sekretáriu Munipál Administrasaun Finansa (SMAF), Alberto Moniz de Araújo, relata ba jornalista sira iha AMC, ohin.
Reseita ne’ebé arrekada husi Autoridade Kovalima hanesan loke feira husi administrasaun Munisípiu hamutuk $20,800.00, aluga salaun postu administrativu Suai $500.00, aluga salaun Administrasaun Kovalima $6,700.00, building dokumentu $4.075 no reseita mai husi Servisu Munisipál Jestaun Merkadu no Turizmu hamutuk $1,986.87.
“Ami fó sai relatóriu bazeia ba reseita iha sistema no ami halo imprime mak $34.061.87 . Iha 2026 ne’e, ita iha servisu munisipál 20 tanba servisu munisipál transporte no komunikasaun foin mak entrega mai munisípiu no iha servisu delegasaun territoriál hamutuk 35”, nia afirma.
Iha fatin hanesan, Diretora Servisu Munisipál Jestaun Merkadu no Turizmu, Tereza Pires, relata konsege arrekada reseita hamutuk $11,302.71.
“Bazeia ba dadus ne’ebé mak ami iha husi Servisu Munisipál Jestaun Merkadu no Turizmu kontribui ona reseita $11,302.71, ami entrega mós ho nia relatóriu no pagamentu husi kliente sira ne’ebé ami entrega hotu ona ba finansa”, nia afirma.
Notisia relevante:SERVE,I.P Kovalima arrekada reseita rihun $17-resin ba kofre Estadu
Jornalista: Celestina Teles
Editór: Florencio Miranda Ximenes
