DILI, 20 Janeiru 2026 (TATOLI)—Diretór Nasionál Ensinu Sekundáriu Jerál Ministériu Edukasaun (ME), Benjamin Fernandes hateten menus manorin ba disiplina desportu iha ensinu sekundáriu jerál no tékniku vokasionál tanba laiha rekursu umanu.
Tuir nia katak tinan kotuk ministériu loke vaga ba disiplina desportu maibé ema ne’ebé aplika na’in-tolu (3) de’it tanba rekursu mak laiha.
“Ba matéria desportu nian, rekursu mak laiha. La’ós ami mak lakohi rekruta. Vaga iha maibé profesór na’in-tolu (3) de’it mak aplika,” Diretór dehan ba TATOLI iha nian kna’ar fatin, Vila Verde, Tersa ne’e.
Benjamin Fernandes esplika universidade sira iha Timor-Leste úniku Universidade Nasionál Timor Lorosa’e (UNTL) mak iha departamentu desportu, maibé sira ho nivel diploma III de’it.
“UNTL iha departamentu desportu, ita haree sira ho nivel diploma III de’it. Maibé tuir lei baze edukasaun, ema ne’ebé hanorin sekundáriu mínimu lisensiatura. Bá-oin ita sei loke tan vaga ba matéria desportu,” nia tenik.
Dirijente ne’e hatutan atu solusiona problema manorin ba desportu iha ensinu sekundáriu jerál no ensinu sekundáriu tékniku vokasionál tenke espanda nia departamentu ba nivel lisensiatura.
Iha fatin seluk, Ministériu Desportu, Arte no Kultura, Nelyo Isaac Sarmento informa atu halo re-jenerasaun ba atleta sira, tenke iha baze ida maihusi edukasaun liuliu iha disiplina desportu.
“Ita hatene katak edukasaun mak baze fundamentu, tanba ne’e desportu tenke mai usi ne’ebá. Nune’e, presiza iha koordenasaun ida hosi Ministériu Edukasaun no UNTL atu mellora departamentu desportu,” Nelyo subliña.
Tuir nia katak desportu husi baze mak presiza manorin desportu, tanba durante ne’e UNTL mak iha departamentu desportu, maibé ho nivel diploma III de’it.
“Ita husu ministériu ensinu superiór no UNTL, atu espanda departamentu desportu husi nivel diploma III ba nivel lisensiatura, atubele hanorin estudante sira,” nia dehan.
Ba kestaun ne’e, Ministru Ensinu Superiór Siénsia no Kultura (MESSK), José Honório da Costa Pereira Jerónimo esplika UNTL nia departamentu desportu ne’e prepara manorin, maibé depende ba sé mak atu uza estudante sira-ne’ebé ramata ona estudu atu hanorin iha ensinu báziku no sekundáriu.
“Kursu ne’e ita bele hasa’e ba lisensiatura, maibé depende ba reitór foun mai, nia hakarak atu muda ka lae. Maibé ha’u hateten ona ba eskola privada sira atu bele uza ita-nia estudante sira-ne’e hodi hanorin iha ensinu báziku no ensinu sekundáriu, tanba desportu hanesan matéria importante ida mós,” nia dehan.
Jornalista: Osória Marques
Editór: Xisto Freitas da Piedade
