DILI 20 Janeiru 2026 (TATOLI)–Polísia Nasionál Timor-Leste (PNTL) asegura no identifika ona joven na’in-haat ne’ebé suspeitadu halo abuzu sexuál hasoru feto ida no halo publikasaun vídeo iha rede sosiál, Facebook hodi sai konsumu públiku.
Hafoin PNTL rekolla faktu no evidénsia vídeo husi fontes sekreta, Autoridade Seguransa iha loron Sesta (16/01/2026) oras 14:00 otl, kontaktu kedas vítima hodi marka prezensa iha edifísiu Vulnerable Police Unit (VPU) Munisípiu Dili hodi buka tuir autór sira.
Relasiona kazu ne’e, sasin feto ida ho inisiál TBCX mós presta deklarasaun. Vítima mós kolabora ho PNTL Komandu Munisípiu Dili husi parte VPU hodi junta hamutuk ekipa Sip Makikit Ministériu Defeza (MD) no Komandante Servisu Informasaun Polísia Ministériu Interiór (MI) hodi buka tuir autór no konsege asegura suspeitu na’in-haat ho inisiál CON, JMPA, JGFPS, no GAAG, enkuantu suspeitu JGPR bá eskola iha Indonezia.
Notísia relevante : Arguidu JDC tama prizaun preventiva ba kazu abuzu seksuál ba menoridade
Nune’e, suspeitu na’in-haat submete ba prosesu identifikasaun iha Komandu PNTL Munisípiu Dili.
Diretór Nasionál Servisu Investigasaun Kriminál, Superintendente Polísia João Belo dos Reis, relata katak iha vídeo ne’ebé Polísia foin hetan no hahú virál iha rede sosiál ne’e, fó sai katak joven balun halo asaun sesuál ho feto ida.
“Ami sei prosesu autór sira ne’ebé envolve,” Superintendente Polísia João Belo, hato’o ba Jornalista sira, iha sala konferénsia Komandu Jerál, Kaikoli, Tersa ne’e.
Nune’e, PNTL sei servisu hamutuk ho Servisu Informasaun Komandu Munisipál iha área ne’ebé mak faktu ne’e akontese hodi bele asegura suspeitu sira hodi halo prosesu.
“Maski família husi vítima no vítima ne’e rasik seidauk hato’o keixa ba Autoridade Seguransa, maibé kazu sira hanesan ne’e hanesan krime públiku, ne’ebé Polísia bele halo inisiativa hodi halo prosesu,” nia esplika.
Jornalista : Natalino Costa
Editora : Julia Chatarina
