DILI, 20 Janeiru 2026 (TATOLI)—Polísia Nasionál Timor-Leste (PNTL) liuhusi Diretór Nasionál Servisu Investigasaun Kriminál, Superintendente Polísia João Belo dos Reis, klarifika ba públiku kona-ba buska, apreensaun no detensaun tau alzelma ba atuál Reitór Universidade de Timor-Leste (UNTL), João Martins inklui kargu xefia na’in-lima iha Kuarta (13/01).
“Públiku barak prokupa kona-ba ezekusaun mandadu ne’e, liuliu atuasaun ne’ebé uza borgol (aljema). Atu klarifika de’it ba públiku katak, uza borgol ne’e tuir estandar ne’ebé mak ami iha, ami mós hetan formasaun husi United Nations Police banhira uluk sira serbisu hamutuk ho ami, suspeitu kuandu ezekuta mandadu detensaun ema ne’ebé mak kaer ne’e la’ós de’it tau borgol iha sira-nia liman, mais tau mós iha sira-nia ain no iha karreta laran kesi tan ho karreta,” Diretór hato’o ba Jornalista sira iha ninia knaar fatin, Kuartel Jerál PNTL, Kaikoli, Tersa ne’e.
Nia dehan, Polísia ezekuta mandadu ne’e tuir padraun no prosedimentu operasionál, ne’ebé laiha indísiu ba violasaun ruma.
“Ita-nia ezekusaun sira ne’e la viola lei, ida-ne’e mós parte ida husi proteje ema sira ne’ebé mak iha ita-nia kontrola laran, depois Polísia mós aseguradu ema ne’e labele desviu husi kontrolu ita-nian,” nia katak.
Notísia relevante : Tribunál aplika TIR ba João Martins inklui kargu xefia UNTL na’in-lima
PNTL liuhusi Diresaun Nasionál Servisu Investigasaun Kriminál (DNSIK) iha Tersa (13/01) ezekuta mandadu Tribunál Judisiál Primeira Instánsia Dili (TJPID) ho NUC 086/25-PNSIK hodi halo buska, apreensaun no detensaun ba Reitór UNTL, João Martins no Vise-Reitór ba Asuntu Administrasaun Finansa no Administradór Jerál inklui kargu xefia na’in-haat seluk tanba iha indísiu ba krime abuzu poder, administrasaun danoza Pekulatu no falsifikasaun dokumentu no anotasaun téknika.
Iha Kódigu Prosesu Penál Timor-Leste artigu 56 Buska, revista no apreensaun urjente.
1). Polísia la presiza mandadu judisiál atu halo buska, revista no apreensaun urjente:
a. Kuandu iha flagrante delitu tanba krime punivel ho pena prizaun; ka
b. Kuandu iha suspeita katak materiál relasionadu ho krime subar hela iha ne’ebá no demora atu hetan autorizasaun bele fo-fatin ba ema-ruma atu al-tera, muda ba fatin seluk ka halakon materiál ne’e ka hamosu perigu ba ema ka sasán nia seguransa.
2). Aktu sira referidu iha númeru anteriór tenke hakerek iha autu-da-okorrén-sia, ne’ebé tenke hatama iha prosesu kriminál respetivu ka entrega kedas ba Ministériu Públiku, kuandu prosesu krime respetivu la hahú kedas, no autori-dade judisiária kompetente tenke apresia aktu ne’e nia validade.
3). Númeru anteriór nia dispozisaun la aplika ba revista kuandu polísia la hetan objetu relasionadu ho krime.
4). Númeru 1 nia dispozisaun la aplika ba buska domisiliária.
Enkuantu husi artigu Artigu 221.º – husi Kódigu Prosesu Penál haktuir ba Mandadu ba detensaun nian mak:
1). Sem prejuizu ba artigu anteriór, nº 2, nia dispozisaun, kuandu la iha fla-grante delitu, tenke iha mandadu judisiál atu halo detensaun, no mandadu ne’e nia duplikadu tenke entrega ba detidu.
2). Iha mandadu ba detensaun tenke hatama:
a. Ema ne’ebé atu kaer nia identifikasaun no kualidade iha prosesu laran;
b. Detensaun nia fundamentu no finalidade;
c. Prosesu nia númeru no identifikasaun.
3). Mandadu tenke halo ho kópia tolu: kópia ida atu hatama iha autus nia laran kuandu iha ona sertidaun kona-ba kaptura, ida ba entidade kaptora nia arkivu,orijinál atu entrega ba detidu iha momentu ne’ebé halo kaptura.
4). Detensaun ne’ebé la tuir artigu ida-ne’e nia dispozisaun la’ós legál.
Jornalista : Natalino Costa
Editora : Julia Chatarina
