DILI, 20 Janeiru 2026 (TATOLI)—Polísia Nasionál Timor-Leste (PNTL) liuhusi Diretór Nasionál Servisu Investigasaun Kriminál, Superintendente Polísia João Belo dos Reis, Tersa ne’e, halo konferénsia imprensa hodi klarifika kona-ba komunidade besik Mota Memo, Munisípiu Bobonaru nia deskobrimentu ba mate-isin ida, iha Sábadu (17/01).
Nia dehan, matebian nu’udar sidadaun Indonézia ho idade 72, ne’ebé mate iha Mota Memo, indentifika katak moris iha Indonézia no nu’udar militár reformadu indonéziu.
“Atu informa ba públiku kona-ba prokupasaun kona-ba informasaun ne’ebé la’o hela iha rede sosiál. Nia mai vizita nia família sira no nia mós iha kartaun eleitorál Timor nian no Kartu Tanda Penduduk (KTP),” João Belo hateten ba Jornalista sira iha ninia knaaar fatin, Kuartel Jerál PNTL, Kaikoli.
Notísia relevante : HNGV klarifika pasiente mate iha 2025 ne’e 1.403 la’ós 9.997
Nia haktuir, husi parte Indonézia sira rekoñese katak matebian ne’e nu’udar sira-nia sidadaun.
“Entaun prosesu tomak ita intrega ba sira,” nia akresenta.
Nia relata, komunidade suspeita katak sidadaun Indonézia ne’e a mota lori maibé prosesu investigasaun tomak iha parte Indonézia sira-nia liman.
“Sira sei update ba ita kona-ba prosesu ne’e rasik, maibé família ne’ebé baibain matebian mai iha Memo ita foti ona informasaun. Liuhusi Komandu Munisípiu liuhusi Sesaun investigasaun Munisípiu Bobonaru nian bolu ona sira atu foti informasaun relativamentu ba kazu ne’ebé mak akontese iha ne’ebá,” nia katak.
Jornalista : Natalino Costa
Editora : Julia Chatarina
