CAC seidauk halo investigasaun ba konstrusaun Igreja Ai-Mutin
DILI, 21 Janeiru 2026 (TATOLI)–Diretór Jerál Komisaun Antí-Korrupasaun (CAC, sigla portugés) José Verdial, hateten, CAC seidauk halo investigasaun ba konstrusaun Igreja Ai-Mutin.
“Ha’u la hatene informasaun husi ne’ebé, maibé to’o agora ita seidauk halo investigasaun ba ida-ne’e,” Diretór hato’o ba Jornalista sira iha ninia knaar fatin, Farol, Kuarta ne’e.
Nia esplika, tanba kuandu CAC atu halo investigasaun ba aktu ruma, lei hateten katak dahuluk tenke iha indísiu ruma ne’ebé ema halo relatóriu ba Polísia haruka ba Ministériu Públiku (MP) hodi halo apresiasaun no rejista ona hanesan auto inkéritu mak foin hahú halo investigasaun.
“Lei no Konstitusaun hateten klaru, iha ita-nia Lei Prosesu Penál mós hateten klaru katak Ministériu Públiku mak sai hanesan na’in ba asaun penál, entaun orgaun Polísia sira labele halo investigasaun uluk kuandu seidauk iha delegasaun kompeténsia,” nia akresenta.
José Verdiál hatutan, to’o agora CAC seidauk simu keixa ba konstrusaun Igreja Ai-Mutin.
“Tanba ita la gosta malu de’it, kualker halo informasaun ida ita lori ema ida, entaun ita tenke rigór iha prosesu sira ne’e,” nia katak.
Notísia relevante : Konstrusaun igreja Ai-mutin, GASC koordena ho CET hodi solusiona
Nia realsa, daudaun CAC seidauk iha investigasaun ba ida-ne’e.
“Kuandu iha indísiu balun ba ida-ne’e, karik ema hato’o keixa ita bele averigua. Kuandu iha indísiu ita haruka ba Ministériu Públiku,” nia katak.
Durante ne’e CAC seidauk iha keixa ruma kona-ba konstrusaun Igreja Ai-Mutin.
“Ita uluk iha informasaun duni, ita akompaña ita-boot kestiona iha mídia, ita-nia inisiativa hahú halibur informasaun, maibé ita laiha indísiu ruma ba korrupsaun, seidauk iha indísiu ba aktu korrupsaun, entaun ita labele halo buat ida,” Diretór subliña.
Jornalista : Natalino Costa
Editora : Julia Chatarina
