DILI, 21 Janeiru 2026 (TATOLI) – Tribunál japonés kondena ona iha loron-kuarta ne’e mane ne’ebé hetan akuzasaun iha tiruteiu fatal ba eis-primeiru-ministru Shinzo Abe iha tinan 2022 ho pena perpétua iha kazu ne’ebé lori atensaun ba Igreja Unifikasaun nia solisitasaun doasaun agresivu sira no nia ligasaun polítika sira.
Prokuradór sira ezije ona pena perpétua ba Tetsuya Yamagami, ho tinan 45, ne’ebé admite ona oho Abe ho kilat ne’ebé halo ho liman durante nia diskursu iha sidade Nara, iha oeste Japaun nian, hodi bolu hahalok ne’e hanesan “krime ida ne’ebé laiha presedente iha istória pós-funu nasaun nian.”
Notísia relevante: PM Taur hato’o sentidu kondolénsia ba falesimentu eis PM Japaun Shinzo Abe
Durante Yamagami nia julgamentu iha Tribunál Distritál Nara, ne’ebé uza sistema juis leigu, nia defensór argumenta katak nia pena prizaun labele liu tinan 20.
Sira afirma katak Yamagami hanesan vítima ida hosi prejuízu ne’ebé kauza hosi grupu relijiozu ida no katak nia edukasaun “trájiku” maka motiva nia hodi oho Abe.
Arguidu hatete katak nia iha ransu hasoru Igreja Unifikasaun tanba nia família hetan estragu finanseiru tanba nia inan nia doasaun barak ba grupu relijiozu, ho pagamentu hamutuk millaun $100 yen ($633,000).
Nia fiar katak, Abe, ne’ebé iha tinan 67 bainhira hetan tiru, “iha sentru hosi envolvimentu polítiku Igreja Unifikasaun nian” iha Japaun. Abe, ne’ebé maka sai hanesan primeiru-ministru Japaun nian ne’ebé maka serbisu kleur liu, sai nafatin hanesan figura polítika ida ne’ebé maka iha influénsia maski nia rezigna-an iha 2020.
Ba julgamentu ho perfil aas, totál ema na’in 685 maka fila iha dadeer hodi dada sorteiu ba kadeira públiku 31 ne’ebé disponivel iha sala julgamentu.
Ho kazu ne’ebé fó naroman ba Igreja Unifikasaun nia solisitasaun ba doasaun estraga sira hosi membru sira, investigasaun governu nian ida lansa, ne’ebé lori ba Tribunál Distritál Tókiu nia orden atu igreja ne’e disolve no hasai nia benefísiu fiskál sira hanesan korporasaun relijioza ida.
Lei ida promulga iha Dezembru 2022 hodi regula tátika angariasaun fundu nian ne’ebé manipulativu hosi organizasaun sira tanba sofrimentu hosi oan sira hosi membru sira Igreja Unifikasaun nian — ne’ebé refere hanesan “jerasaun daruak” nia seguidor sira — bolu atensaun públiku nian.
Eskrutíniu kona-ba ligasaun sira igreja nian ho deputadu sira hosi Partidu Demokrátiku Liberál ne’ebé iha podér aumenta, ho balun ne’ebé tuir informasaun hetan apoiu durante kampaña eleitorál sira.
Notísia relevante: PR Horta hato’o sentidu kondolénsia ba falesimentu eis PM Japaun Shinzo Abe
