DILI, 21 Janeiru 2026 (TATOLI)-Komisaun A ne’ebé Trata Asuntu Konstitusionál no Justisa iha Parlamentu Nasionál propoin atu halo alterasaun ba Kódigu Sivíl hodi fó rekoñesimentu ba kazamentu iha relijiaun seluk.
Prezidente Komisaun A, Natalino dos Santos, hateten iha reuniaun Komisaun, ohin, hahú diskute ida-ne’e atu haree ba alterasaun Kódigu Sivíl, tanba iha preokupasaun husi sidadaun sira husi relijiaun sira seluk hanesan Musulmana no Protestante, atu trata sertidaun kazamentu.
Tanba ne’e, haree filafali ba Konstituisaun, Kódigu Sívil no lejislasaun relevante sira seluk, iha posibilidade atu halo artikulasaun ho Governu hodi haree no fasilita sidadaun timoroan husi relijiaun sira ne’e.
“Entaun, Komisaun haree asuntu ne’e importante no ami diskute iha diversu, hodi bele haree alterasaun substansiál ba Kódigu Sívil hodi hatama iha laran ou bele iha referénsia balun atu ko’alia ho Ministériu Justisa hodi fasilita, tanba ne’e direitu sidadaun hothotu iha”, Natalino dos Santos hateten hafoin sorumutu Komisaun iha Parlamentu, ohin.
Komisaun fó ona serbisu ba parte asesór jurídiku atu trata serbisu sira ba oin, nune’e iha reuniaun tuirmai bele diskute hodi hetan solusaun.
Membru Komisaun A, deputadu Joaquim dos Santos reforsa katak tempu ona atu halo alterasaun ne’e hodi presiza iha tratamentu hanesan ba sidadaun hotu, bazeia ba Konstituisaun artigu 16 kona-ba Universalidade, nune’e mós artigu 45 sobre Liberdade Konfisaun Relijiozu.
“Tempu ona Parlamentu foti inisiativa hodi garante relasaun entre sidadaun sira iha diferensa relijiaun. Nune’e mós Governu garante ninia asisténsia ba sidadaun sira, liuliu iha prosedimentu atu hetan sira-nia direitu presiza regula”, afirma.
Antes ne’e, Prezidente Musulmanu iha Timor-Leste, Pacoal Sidik Lemorai, hato’o ona pedidu ne’e ba órgaun soberania sira iha país ne’e atu haree kestaun referida.
Ezijénsia ne’e atu altera, liuliu iha artigu 1435 no 1475 kona-ba rekoñesimentu kazamentu nian iha Kódigu Sívil ne’ebé rekoñese de’it kazamentu Katóliku, maibé la rekoñese relijiaun sira seluk, nune’e difikulta bainhira atu hetan sertidaun kazamentu.
Tuir sensu populasaun iha tinan 2025, populasaun ne’ebé la’ós Katóliku ne’e konstitui pursentu rua (2%).
Notísia relevante: Komisaun A prioriza alterasaun Kódigu Sivíl atu rekoñese kazamentu iha relijiaun seluk
Jornalista: Nelson de Sousa
Editora: Maria Auxiliadora
