DILI, 21 Janeiru 2026 (TATOLI) – Komisaun A ne’ebé Trata Asuntu Konstitusionál no Justisa iha Parlamentu Nasionál delibera hodi aprova ona planu prioridade ba atividade tinan ne’e, liuliu atu trata lejislasaun sira, inklui halo alterasaun ba Kódigu Penál.
Prezidente Komisaun A, Natalino dos Santos, hateten alterasaun Kódigu Penál atu hatán ba preokupasaun sidadaun sira-nian, liuliu hakarak atu kriminaliza insestu, nomós kestaun asédiu seksuál no hakarak kriminaliza defamasaun no injúria.
“Ita haree kuaze uza mídia sosiál hodi ataka no insulta ema nia privada, entaun ami haree iha posibilidade atu halo alterasaun ba Kódigu Penál”, nia hateten iha Parlamentu, ohin.
Tuir nia, tenke iha regra hodi regulariza atu restaura kultura respeita malu. “Ami hatama ona iha planu Komisaun, hetan ona aprovasaun, no sei fó prioridade ba alterasaun”, dehan.
Komisaun mós sei fó prioridade ba diskusaun Lei Sibernétika, Lei Dadus Pesoál no Orden Advogadu.
Notísia relevante: Bankada CNRT ezije aprezentasaun Lei Sibernétika hodi kontrola ID falsa
Jornalista: Nelson de Sousa
Editora: Maria Auxiliadora
