DILI, 21 Janeiru 2026 (TATOLI)-Ministru Petróleu no Rekursu Minerál, Francisco Monteiro, informa Governu Timor-Leste (TL) no Austrália kontinua halo kontaktu ba malu hodi finaliza dokumentu sira relasiona ho dezenvolvimentu Projetu Greater Sunrise, ne’ebé posivel atu konkretiza iha tinan ida-ne’e.
Francisco Monteiro hateten katak progresu Projetu Greater Sunrise kontinua la’o di’ak, ho objetivu atu asegura kadoras mai Timor-Leste ne’ebé viavel husi aspetu tékniku no komersiál.
“Tama ba tinan foun, ita kontinua inisia kontaktu no iha Marsu 2026 ita sei iha filafali ronda negosiasaun ida. Ita tama ba finalizasaun dokumentu importante tolu ne’ebé tratadu ezije mak dokumentu Esplorasaun Kódigu Mineiru ba Petróleu [PMC], Kontratu Fahe Produsaun no Rejime Fiskál”, Francisco Monteiro hateten iha Palásiu Governu, ohin.
Nia esplika katak daudaun parte Governu Timor-Leste, Austrália no kompañia konsórsiu sira nafatin halo esforsu másimu hodi konklui prosesu ne’e ho lalais.
Tuir nia, esforsu entre Governu rua kontinua la’o, no ho antisipasaun vizita Primeiru-Ministru Austrália, Anthony Albanese, mai Timor-Leste iha fulan ida-ne’e, sira-nia parte sei halo esforsu nune’e prosesu ne’e bele hetan apoiu intensivu liután
“Iha vizita Primeiru-Ministru Austrália mai ne’e, ita iha ona kontaktu mós ho kompañia sira. Iha buat balun ne’ebé Governu bele fó tan apoiu. Husi Austrália, Timor-Leste, nomós kompañia sira bele intensifika [esforsu] liután iha tinan ida-ne’e nia laran”, nia salienta.
Lembra katak, iha loron 21 Marsu 2025, Ministru Francisco Monteiro antes ne’e hateten atu finaliza dokumentu prinsipál tolu, ekipa neʼebé komposta husi Autoridade Nasionál Petróleu (ANP), Timor GAP ho ninia ekipa hamutuk ho espesialista sira kada fulan realiza enkontru, ne’ebé bele akontese iha Timor-Leste no iha Austrália.
“Entre enkontru kada fulan, iha mós enkontru regulár kada semana ba tékniku espesífiku ba asuntu sira ne’e. Ho enkontru sira ne’e mak ita bele dehan 90% dokumentu PMC [kuaze] konklui, dokumentu Kontratu Fahe Produsaun 80% no dokumentu Rejime Fiskál mak sei iha diskusaun laran”, Francisco Monteiro hateten iha entrevista eskluziva iha estúdiu TATOLI.
Notisía relevante: Dokumentu sira ba dezenvolvimentu Projetu Greater Sunrise besik konklui
Jornalista: Arminda Fonseca
Editora: Maria Auxiliadora
