OEKUSI, 21 Janeiru 2026 (TATOLI) – Primeiru-Ministru (PM), Kay Rala Xanana Gusmão, kuarta ne’e, oferese hela mobiliáriu hanesan, banku 12, kadeira ba altar tolu no ambaun ida bá Kapela Nossa Senhora Maria Auxiliadora Postusika iha Odamatan Lifau, perténsia suku Lifau, sub-rejiaun Pante Makasar, Rejiaun Administrativa Espesiál Oekusi Ambeno (RAEOA), atu sarani sira bele utiliza ba atividade relijioza iha kapela ne’e.
Hafoin entrega ba sarani sira, Xefe Governu, ho laran-ksolok no agradese ba asaun solidariedade Oekusi-oan Rofino da Costa Rao, nu’udar Jestór empreza Rainaldo’s Unipesoál Lda, tanba ho domin bele ajuda sasán hirak-ne’e ba sarani sira.
“Ita hotu agradese tebes ba Oekusi-oan ida tanba nia laran di’aktebes; solidariedade ba malu no karidade ba malu ne’e importante, tenke haree hanesan nafatin, saida mak ita, ema seluk husu bele ajuda malu, la’ós ba privadu de’it maibé ba ema barak nian. Ita hotu rona amu sira baibain ko’alia iha igreja, hadomi malu, perdua malu no ajuda malu ba, tanba imi mesak Oekusi-oan,” PM Xanana iha Kapela Postusika dehan, ohin.
Notísia relevante: https://tatoli.tl/2025/07/29/dom-virgilio-kardeal-inaugura-kapela-nossa-senhora-maria-auxiliadora-iha-odamatan-lifau/
Katekista Kapela Santa Maria Auxiliadora, Joaquin Hornai, kontenti tanba durante konstrusaun kapela Nossa Senhora Maria Auxiliadora ho nia medida 13×10, hetan kontribuisaun másimu husi sarani sira iha bairru Postusika kada uma-kain kontribui dolár $20, no mós hetan apoia fundu rihun $10 husi Primeiru-Ministru, Kay Rala Xanana Gusmão,
“Ami sente kontente, maske enfrenta dezafiu oioin, maibé ohin loron bele kompleta ona,. Kontribuisaun ba oin, ami sei planu kada domingu sei selebra misa, kuandu ita ba parókia dook, entaun sira-ne’ebé laiha transporte la’o labele, bele mai misa de’it iha kapela ne’e tanba ne’e agradese ba apoia tomak husi Avo Nana no kompañia sira-nia tulun” nia orgullu
Notísia relevante:PM Xanana sei apoia sarani Bobokase finaliza Kapela São Carlos Boromeu Bimelo
Entretantu, iha faze konstrusaun, PM Xanana apoia finansiamentu ho valór rihun $10 no hetan ona bensaun hosi Arsebispu Arkedioseze Dili, Dom Virgílio Kardeál do Carmo da Silva, SDB iha loron 28 fulan-Jullu 2025, no inaugura husi Primeiru-Ministru liuhusi asina plaka iha loron tersa 30 Dezembru 2025.
Jornalista: Abílio Elo Nini
Editór: Rafael Ximenes de A. Belo
