Ministériu Interiór sei rekruta membru PNTL 600 iha tinan ne’e

DILI, 22 Janeiru 2026 (TATOLI)-Ministru Interiór (MI), Francisco da Costa Guterres, informa katak iha Orsamentu Jerál Estadu (OJE) 2026 prevee ona atu halo tan rekrutamentu ba membru Polísia Nasionál Timor-Leste (PNTL) foun hamutuk na’in-600.

“Sei lori bá Konsellu Ministru husu atu rekruta tan to’o 600 iha fulan-Juñu ou Jullu hahú prosesu’’, ministru adianta hafoin ramata audiénsia ho Komisaun B ne’ebé trata Asuntu Negósiu Estranjeiru, Defeza ho Seguransa, iha Parlamentu Nasionál, ohin.

Komisaun rekrutamentu sei mantein kritéria jerál ne’ebé iha, eseptu ba regra ne’ebé foin lalais tribunál deklara inkonstitusionál.

Notísia relevante: Sekretariadu Rekrutamentu rejista aplikante 13.772 konkorre ba vaga PNTL

Rekrutamentu ne’e hodi responde ba nesesidade instituisaun nian tanba falta rekursu umanu no iha membru polísia na’in 180-resin atu reforma.

Governante ne’e relata katak kona-ba rekrutamentu membru PNTL foun ne’ebé hala’o iha tinan kotuk komisaun rekrutamentu sei fó sai rezultadu iha fulan-Janeiru ou Fevereiru tinan ida-ne’e.

Notísia relevante: https://tatoli.tl/2025/12/23/komisaun-rekrutamentu-fo-sai-rezultadu-vaga-pntl-iha-janeiru-2026/

Prezidente Komisaun B, Domingos Augusto ‘Deker’, fó apoiu ba rekrutamentu ne’e ho razaun PNTL falta rekursu umanu no barak idade tama reforma, balun ho kondisaun moras temporária no permanente.

Jornalista: Nelson de Sousa

Editora: Maria Auxiliadora