DILI, 12 Setembru 2025 (TATOLI)—Sekretariadu Rekrutamentu rejista ona aplikante hamutuk 13.772 submete ona sira-nia dokumentu hodi konkorre ba vaga membru foun Polísia Nasionál Timor-Leste (PNTL).
“To’o horisehik munisípiu sira submete ona dokumentu sira-nia kandidatu mai iha Sekretáriudu Nasionál. Kandidatu ne’ebé submete ona dokumentu ne’e hamutuk 13.772,” Portavós Sekretariadu Rekrutamentu, António da Luz hateten ba Jornalista sira, iha Sentru Formasaun Polísia, Komoro, Sesta ne’e.
Sekretariadu halo selesaun ba dokumentu nune’e karik iha dokumentu ne’ebé kompletu maka kandidatu ne’e pasa maibé karik la prienze kritéria maka la pasa ba faze tuir mai.
“Orsida Sekretáriadu hahú verifika, ita-nia tempu ne’e iha semana ida para halo verifikasaun, kuandu hotu mak sei taka sai naran ba públiku no fó tempu ba kandidatu sira atubele haree lista naran sira, sé mak naran prepara ba ezame,” nia akresenta.
Portavós dehan, Sekretariadu sei fó sai loron tuir ezame iha loron 05 Outubru 2025, “Espera katak prosesu hotu la’o di’ak, dia 05 ita hahú ba ezame.”
“Prova kulturál ita halo iha munisípiu idaidak, só ezame fíziku mak halo iha Sentru Formasaun Polísia Komoro Dili,” nia katak.
Notísia relevante : Joven Vikeke 754 submete dokumentu ba vaga PNTL
PNTL koopera ho Ministériu Edukasaun ba elaborasaun perguntas ba prova kulturál. Tipu prova kulturál ba rekrutamentu membru Polísia foun ne’e halo hanesan ezame nasionál ba estudante sira, ne’ebé kandidatu sira tenke lori lapis 2B, régua, apagadór no afiadór no fila ba resposta modelu hanesan folla de responta ezame nasionál.
“Tanba ne’e, ohin Sesta ne’e Sekretariadu Rekrutamentu ba Membru Polísia sira konvida reprezentante husi Ministériu Edukasaun hodi fó simulasaun ba ekipa rekrutamentu kada munisípiu oinsá sira bele hatene lala’ok kona-ba regra teste ezame kulturál ba kandidatu husi kada munisípiu sira,” Portavós tenik.
Bainhira regra ba teste mak sala karik komisaun sei prepara sala rua ba kandidatu na’in-40 mak sei priense, ne’ebé sala ida sei priense husi ema na’in-20.
“Iha ema na’in-rua mak sai supervizaun ba kandidatu sira iha sala laran durante ezame ne’e la’o,” nia hato’o.
Aleinde ne’e, kandidatu sira ne’ebé ba tuir ezame tenke lori resivu ne’ebé mak komisaun fó ona momentu submete dokumentu.
Ekipa Responsável sei elimina kandidatu ne’ebé la lori resivu husi prosesu rekrutamentu, tanba resivu nu’udar rekezitu ida atu inklui iha prosesu tuir mai.
Kondisaun seluk, kandidatu ne’ebé admitidu iha ezame kulturál ne’e tenke ho valór 60, enkuantu valór 59 mós la liu iha ezame ne’e no elimina kedan iha faze ne’e.
Kandidatu sira ne’ebé atu tuir ezame kulturál ne’e tuku 8:00 dadeer tenke marka ona prezensa nune’e supervizór sira halo pasa revista ba sasán sira ne’ebé presiza lori nune’e bele hahú teste iha tuku 10:00.
Jornalista : Natalino Costa
Editora : Julia Chatarina
