DILI, 22 Janeiru 2026 (TATOLI)-Ministru Komérsiu no Indústria (MKI), Filipus Nino Pereira, informa katak problema pagamentu saláriu báziku no désimu terseiru ba funsionáriu sira sei rezolve iha fulan ne’e.
Funsionáriu sira ne’ebé la simu saláriu báziku no désimu terseiru ne’e, permanente iha ema na’in-208 no kontratadu 403.
Governante ne’e dehan saláriu báziku no désimu terseiru ba funsionáriu permanente balun simu ona iha Dezembru 2025 no seluk simu iha Janeiru ne’e.
“[Saláriu] ba funsionáriu kontratadu iha prosesu nia laran. Sira sei simu saláriu báziku no saláriu désimu terseiru iha fulan ida-ne’e nia laran”, Filipus Nino Pereira hateten iha Matadouru, Dili, ohin.
Nia esplika katak hafoin tama tinan foun 2026 ministériu mós seidauk halo kontratu ba funsionáriu kontratadu sira ne’ebé nia serbisu ramata iha 31 Dezembru 2025.
“Signifika sira laiha ona relasaun ho ministériu, maibé bainhira Dekretu-Lei kona-ba Rejime Jurídiku ba Kontratu Traballu ho Termu Sertu iha Administrasaun Públika vigór ona mak ita haree, karik presiza funsionáriu sira atu aumenta forsa traballu iha ministériu nian mak ita halo rekrutamentu foun ba kontratadu sira”, dehan.
Nino Pereira salienta katak ministériu presiza funsionáriu kontratadu barak, tanba atu apoia serbisu diresaun sira hodi halo kontrolu ba loja sira no seluk tan.
Relasiona ho problema iha pagamentu saláriu báziku no désimu terseiru, ministru esplika katak ninia kauza ne’e tanba ministériu iha fulan klaran halo rekrutamentu foun, no halo mudansa salariál, nune’e afeta ba kapasidade ezekusaun, liuliu iha kategoria saláriu no vensimentu.
“Ami haree ona prosesu ne’e no orienta ona Gabinete Inspesaun Auditoria Interna no Gabinete Inspesaun Jerál Estadu atu mai haree asuntu ida-ne’e ho sériu”, dehan.
Lembra katak iha, loron 12 Janeiru 2026, Governu liuhusi reuniaun Konsellu Mininistru deside hasai ka foti millaun $4,5 husi Orsamentu Jerál Estadu (OJE) 2026 hodi fasilita pagamentu estraordináriu (gaji 13 ka saláriu 13°) no saláriu negativu (mensál) hahú husi Outubru to’o Dezembru 2025.
Konsellu Ministru halo analiza dadus ne’ebé Ministériu Finansa aprezenta kona-ba prosesu regularizasaun ba pagamentu saláriu désimu terseiru tinan 2025 nian, inklui husi grupu traballu ba reforma jestaun rekursu umanu Administrasaun Públika nian, kona-ba inisiativa revizaun ba rejime jurídiku kontratasaun termu sertu iha administrasaun públika.
Notísia relevante: Komisaun C bolu MF no BNCTL klarifika atrazu pagamentu désimu terseiru
Jornalista: Arminda Fonseca
Editora: Maria Auxiliadora
