DILI, 22 Janeiru 2026 (TATOLI)-Ministru Komérsiu no Indústria, Filipus Nino Pereira, informa katak lansamentu fatuk dahuluk ba konstrusaun Merkadu Modernu Munisipál Ermera sei realiza iha Fevereiru.
“Ita planeia ona Merkadu Munisipál Ermera sei lansa fatuk dahuluk ba konstrusaun nian iha loron 05 Fevereiru tinan ne’e, tanba iha ona empreza manán-na’in ne’ebé asina ona kontratu”, Filipus Nino Pereira adianta iha Matadouru, Dili, ohin.
Empreza ne’ebé sei halo konstrusaun ba merkadu ne’e mak Henan Fifth Construction Group Co.,Ltd husi Xina ho totál orsamentu $8.861.517,89, ne’ebé mai husi Fundu Infraestrutura.
Nia salienta katak kona-ba lansamentu fatuk dahuluk ba Merkadu Munisipál Baukau no Lautein nian seidauk, tanba nia prosesu sei iha Komisaun Nasionál Aprovizionamentu, ne’ebé sei hein fiskalizasaun husi Tribunál Konta.
Tuir nia, objetivu harii merkadu munisípal sira atu akomoda vendedór hothotu no tulun ekonomia povu nian bele la’o ho di’ak.
Aleinde ne’e, iha tinan ida-ne’e mós Governu planeia halo estudu kona-ba dezeñu ba merkadu haat iha munisípiu haat mak hanesan Bobonaru, Kovalima, Ainaru no Manufahi, inklui mós halo estudu viabilidade ba sentru komersiál rua iha merkadu Manleuana no Taibesi, tanba orsamentu aprova ona iha tinan kotuk.
Kona-ba estudu viabilidade ba merkadu rua ne’e, ba merkadu Manleuana prevee rihun $215 no Taibesi rihun $241.
Notísia relevante: Konstrusaun ba merkadu modernu tolu tama ona konkursu públiku
Jornalista: Arminda Fonseca
Editora: Maria Auxiliadora
