OEKUSI, 22 Janeiru 2026 (TATOLI) – Primeiru-Ministru (PM), Kay Rala Xanana Gusmão, kuarta ne’e, hala’o vizita traballu dala ikus nian ba pasiente sira iha Ospitál Referál Rejiaun Administrativa Espesiál Oekusi Ambeno (RAEOA), observa mós fasilidade sira inklui ai-moruk iha estabelesimentu ospitalár ne’e.
Hafoin ramata vizita, Primeiru-Ministru sei koordena ho Ministériu Saúde atu identifika kona-ba funsionamentu hanesan rekursu umanu, fasilidade inklui ai-moruk sira iha Ospitál Referál Oekusi.
“Loloos Ministériu Saúde mós mai hotu, karik iha buat ruma falta karik sira bele haree, ne’ebé ha’u mai vizita ita-nia inan-aman sira no oan sira-ne’ebé hala’o hela tratamentu iha ospitál ne’e, kona-ba buat seluk, sira saúde sei mai fali atu haree,” Primeiru-Ministru hato’o ba jornalista sira, iha Ospitál Referál Oekusi, kinta ohin.
Notísia relevante:Komisaun F deteta problema tolu iha Ospitál Referál Oekusi
Diretór Ezekutivu Ospitál Referál Oekusi, Manuel da Cunha, konsidera ho prezensa Primeiru-Ministru iha Ospitál bele enkoraja funsionáriu no pesoál saúde sira atu hatudu prestasaun serbisu di’ak no anima mós pasiente sira-ne’ebé hala’o hela tratamentu.
“Obrigadu Avo, ami kontente, tanba ita mai iha ne’e hanesan motivasaun boot mai ami, atu oinsá ami bele iha forsa no vontade maka’as liután, hodi reforsa prestasaun serbisu, ohin ita haree rasik, ita-nia pasiente sira animadu tebes ho prezensa Avo,” nia orgullu.
Notísia relevante:Vise-Ministru Saúde rekomenda tau atensaun ba fasilidade iha ospitál Oekusi
Tuir observasaun Ajénsia Tatoli,I.P, Primeiru-Ministru akompaña hosi Ministra Finansas, Santina José Rodrigues F. Viegas Cardoso, Ministru Administrasaun Estatál, Tomas do Rosário Cabral, Ministru Planeamentu no Investimentu Estratéjiku, Gastão Francisco de Sousa, Prezidente Komisaun Funsaun Públika (KFP), Agostinho Letêncio de Deus, Prezidente Autoridade RAEOA, Régio da Crúz Salu, Diretór Ezekutivu ADN, Januário M. Guterres.
Jornalista: Abílio Elo Nini
Editór: Rafael Ximenes de A. Belo
