OEKUSI, 15 Agostu 2025 (TATOLI)–Vise-Ministru ba Fortalesimentu Institusionál Saúde, José dos Reis Magno, rekomenda ba Autoridade Rejiaun Administrativa Espesiál Oekusi Ambenu (RAEOA), lideradu husi Rogério Tiago de Fátima Lobato, atu tau atensaun ba fasilidade saúde sira-ne’ebé iha Ospitál Referál Oekusi.
Governante hato’o nia rekomenadasaun ne’e hafoin vizita traballu iha Ospitál Referál Oekusi, hamutuk ho Sekretáriu Rejionál ba asuntu Saúde, Luís de Jesus Neno, sesta-ne’e.
“Ha’u mai atu observa faslidade no atendimentu sira, maibé kama ba pasiénte atu toba 24 de’it, kompara ho pasiénte ne’ebé baixa liu ona kama sira-ne’e, entermus indikadór sira di’ak loos, edifisíu laboratóriu maibé seidauk prenxe ho ekipamentu sira-ne’ebé adekuadu hanesan parameter sira ho loloos tenki iha, depois edifisíu ICU mós konstruidu ona, falta kompleta ho eletrisidade no mós kestaun seluk tan, nune’e bele funsiona hanesan ospitál sira seluk”, nia dehan ba jornalista sira iha ospitál Oekusi.
Notísia relevante:Ospitál Referál Oekusi rejista bebé na’in-neen lakon vida durante trimestre dahuluk
Governante ne’e orgullu, tanba hafoin observa hatudu atendimentu no fasilidade seluk inklui estoke ai-moruk garantidu, maibé observasaun seluk katak, sala Unidade Kuidadu Intensivu (ICU, sigla inglés) kompleta ho kama-ualu, maibé ekipamentu sei mamuk hela. Tan ne’e, espera Prezidente Autoridade RAEOA ho serbisu saúde rejionál bele halo ona esforsa atu haree saida de’it mak nesesita, atu kompleta iha tinan tuir mai.
“Tanba preokupasaun boot mak ne’e, Ospitál Oekusi dook husi Dili, maibé Oekusi nia estatutu espesiál, entaun Prezidente Autoridade RAEOA presiza tau atensaun maka’as la’ós ba ospitál de’it maibé ba saúde tomak, karik saida mak labele halo entaun bele koordena ho ministériu hodi apoia malu, ne’ebé rezultadu ohin ha’u rasik observa, sei fila ba Dili informa ba Ministra atu haree problema sira-ne’e”, nia hateten.
Iha biban ne’e, Sekretáriu Rejionál ba Asuntu Saúde, Luís de Jesus Neno, rekoñese problema hirak ne’e sei aposta iha Planu Asaun Anuál (PAA) ba Orsamentu Jerál Estadu (OJE) 2026 nian.
“Ekipamentu liuliu kama ba pasiénte sira la sufisiénte, 24 de’it, ha’u hanesan membru Autoridade RAEOA iha ona hanoin atu aumenta, tanba ita iha ona planu atu tinan oin sei aumenta sala neonatolojia no aumenta sala maternidade, ne’ebé sala maternidade ne’e sei aumenta kama, entaun ita komesa prepara kondisaun atu prepara Ospitál Rererál Oekusi bele sai ospitál rejionál, ida-ne’e mak ita planu ona kada tinan tau osan atu prepara neneik to’o tinan ida bele muda ona nia status husi referál ba rejionál, ne’ebé fasilidade hanesan sala ICU laboratóriu ne’e ita tau ona iha planu atu kompleta”, nia dehan.
Notísia relevante:Prezidente Autoridade RAEOA deteta problema lima iha Hospital Referénsia Oé-Cusse
Observasaun jornalista TATOLI, I.P, durante vizita traballu ne’e, Vise-Ministru ba Fortalesimentu Institusionál Saúde, José dos Reis Magno, akompañia mós husi Diretóra Jerál Kuidadu Saúde Primaria, Elizabet Leto Mau, fahe mós nesesidade bázika hanesan forremungu, susu, manu-tolun, ai-fuan no seluk tan ba pasiénte sira iha Ospitál Referál Oekusi.
Jornalista : Abílio Elo Nini
Editora : Rita Almeida
