OEKUSI, 28 Marsu 2025 (TATOLI) – Iha trimestre dahuluk hahú husi fulan-Janeiru to’o Marsu 2025, Ospitál Referál, Rejiaun Administrativa Espesiál Oekusi Ambeno (RAEOA) rejista kazu bebé na’in-neen lakon vida no laiha dadus mate ba inan isin-rua sira.
“Janeiru bebé na’in-rua mak mate, bebé ida pediátria fulan-neen no ida seluk nia moris foin loron haat ka lima lakon ona vida. Iha fulan-Fevereiru mak bebé na’in-rua mate, tama iha neonotolojia seidauk to’o semana mate, to’o Marsu ne’e agora, ita rejista bebé na’in-rua lakon vida, nune’e iha trimestre dahuluk ita rejista bebé na’in-neen mak lakon sira-nia vida iha Ospitál Referal Oekusi,” Diretór Jerál Ospitál Referál Oekusi, Manuel da Cunha hateten ba jornalista sira, ohin.
Notísia relevante: Primeiru-Ministru lansa dijitalizasaun sistema saúde iha RAEOA
Kauza seluk bebé lakon vida tanba inan-sira ladun asesu ba fasilidade saúde, hafoin besik partu ho kondisaun grave maka hakbesik ba iha fasilidade saúde sira.
Aliende ne’e mós maske asesu ba iha fasilidade saúde no konsege simu orientasaun no promosaun husi parteira no dotor sira katak bainhira fila to’o uma sente bebé la book-an iha kabun, presiza lalais ba fasilidade saúde ne’ebé besik hodi hetan atendimentu garantidu husi profisionál saúde sira.
“Maibé dalaruma tarde, atu hakbesik ba fasilidade saúde ne’ebé besik, karik mai sedu entaun hetan atendimentu di’ak hodi hetan salva, no dalaruma mós liga ho kultura, inan balu prefere liu ba kultura, entaun tarde mai iha fasilidade saúde, maske parteira no dotor sira destaka ona iha postu saúde no sentru saúde sira iha terrtóriu Oekusi,” nia katak.
Notísia relevante:Autoridade reativa atendimentu saúde iha Hospital Referál Oé-Cusse
Maske nune’e parte servisu saúde kontinua halo sensibilizasaun no promosaun ba iha nivél suku no aldeia, liuhusi programa kuidadu saúde inan no oan no mós programa nutrisaun fokuliu ba advokasia ba susuben.
Nia informa, bebe sira-ne’ebé moris iha Ospitál Referal Oekusi, iha trimestre dahuluk kazu na’in-40 mak moris tanba kada fulan ospitál sempre fó atendimentu ba bebe na’in-15.
“Exemplu loron ida de’it, ospitál sempre fó atende ba bebe moris, ne’ebé iha trimestre dahuluk ne’e kuaze na’in-40, tanba kada fulan maiju menus bebe na’in-15 mak moris iha Ospitál Referal Oekusi,” nia hateten
Entretantu, totál espesialista fó atendimentu bebe hamutuk na’in-rua, ho funsaun mak fó atendimentu no ba operasaun ba inan isin rua to’o partu, no mós iha apoia husi parteira sira iha Opsitál Referal Oekusi hamutuk na’in-16 ne’ebé fahe tarefa servisu kalan ida ema na’in-tolu.
“Ne’ebé iha Opsitál Referal Oekusi sufisiénte ba rekursu umanu, dalaruma destiñu Maromak nian, entaun balu ita konsege salva no balu la konsege, maibé kona-ba item ai-moruk ita laiha problema mós,” nia katak.
Selviana Queno nu’udar pasiente husi aldeia Mahata, “Ha’u mai konsulta dala-rua ona, iha semana kotuk no ohin tanba labarik mear no isin manas, ne’ebé ha’u-nia observasaun ita-nia dotor sira fó atendimentu di’ak, no mós ai-moruk, la’ós mai to’o dehan ai-moruk laiha, maibé saida mak ami senti no haree laiha problema kona-ba ai-moruk,” nia katak.
Notísia relevante:Autoridade RAEOA observa kompañia fornese hahán ijiéniku ba ospitál referál
Jornalista: Abílio Elo Nini
Editór: Florencio Miranda Ximenes
