OEKUSI, 06 Marsu 2025 (TATOLI)– Autoridade Rejiaun Administrativa Espesiál Oekusi Ambeno (RAEOA), liuhusi Sekretária Rejionál ba Asuntu Saúde hamutuk ho dirijente sira iha Ospitál Referál Oekusi hala’o inspesaun ba kompaña fornesedór ai-han ba pasiénte sira.
Iha atividade inspesaun ne’e nota katak kompañia hatudu atendimentu di’ak tanba fornese hahán ijiéniku ba pasiente ho família no funsionáriu pikete sira.
Notísia relevante:Autoridade ofisializa kompañia tolu apoia serbisu iha fasilidade saúde Oé-Cusse
Entretantu, kompañia Dezimár Unipesoál Lda, fornese ai-han ba Ospitál Referál Oekusi ho valór kontratu hamutuk rihun $41,35.00 ho durasaun tinan ida.
“Ohin, ami mai observa hela hahan ne’ebé oferese ba pasiente sira iha ospitál nota kompaña prepara hahán di’ak no ijiene,” hateten Sekretária Rejionál ba Asuntu Saúde, Luís de Jesus Neno ba jornalista sira iha Ospitál Referál Oekusi, ohin.
Durante ne’e, nia dehan parte ospitál informa liuhusi relatóriu katak fornesimetnu ai-han no atendimentu iha ospitál la’o di’ak la tarde ba pasiente sira no prepara menu tuir orientasaun médiku sira ba pasiente sira-ne’ebé presiza ai-han ruma.
Tan ne’e, presiza tuun direita atu observa tanba pasiente sira-ne’ebé baixa ho família iha ospitál tenke konsumu hahan ne’ebé di’ak ho proteina aas, nutrisaun no karbohidrat ne’ebé di’ak, nune’e nia moras bele rekupera lalais.
“Ita haree mós nia limpeza liuliu sasan sira ne’ebé atu tein, ohin ami haree katak sira prepara buat hotu moos hanesan fatin nia (kompañia) iha responsabilidade ba atividade ne’ebé durante nia simu kna’ar nu’udar kompañia fornesedór, ami haree katak nia prepara hahán ne’e di’ak tebes,” nia orgullu.
Iha biban ne’e, Dulce Imaculada da Conçeição, reprezentante kompañia Dezimár Unipesoál Lda, nia informa katak kada loron fornese ai-han ba pasiente ho família no mós staf pikete sira ba pasiente sira-nia menu ne’e iha oin rua, exemplu sira-ne’e dieta jerál menu hahán seluk no dieta espesiál la hanesan.
“Exemplu ba pasiente direta jerál konsumu na’an manu sona, entaun ita haree fali ba dieta espesiál balun labele han mina barak, entaun ami halo fali sup-ayam, depois ba pikete sira, família no pasiente jerál menu hanesan de’it só diferensia mak sira-ne’ebé dieta espesiál de’it,” nia hateten.
Notísia relevante:Prezidente Autoridade RAEOA deteta problema lima iha Hospital Referénsia Oé-Cusse
Jornalista: Abílio Elo Nini
Editór: Florencio Miranda Ximenes
