OÉ-CUSSE, 02 abríl 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhusi Sekretáriu Rejionál bá Asuntu Saúde, ofisializa kompañia tolu hodi apoia serbisu atu fornese hahán bá pasiénte sira, limpeza no seguransa nian iha fasilidade saúde sira.
Notísia relevante: Prezidente Autoridade RAEOA deteta problema lima iha Hospital Referénsia Oé-Cusse
Kompañia tolu ne’e mak hanesan, dahuluk, Falo Kaba Unipesoál Lda atu apoia seguránsa ba fasilidade saúde hahú husi hospitál referál, klínika kurasaun, sentru saúde lima no postu saúde 20 iha territóriu Oé-Cusse ho valór kontratu $197,520.00 hodi troka kompaña PAX Unipesoál Lda.
Daruak, kompaña Colneno Unipesoál Lda atu apoia limpeza ho valór kontratu $285,282.75, datoluk kompaña Dezimar Unipesoál Lda, atu fornese hahán ba pasiente sira iha hospitál referál Oé-Cusse ho valór kontratu $41,35.00.
“Sira-nia kontratu ne’e, hahú ohin loron 01 maiu sei termina iha loron 31 dezembru 2024,” Sekretáriu Rejionál bá Asuntu Saúde, Luís de Jesus Neno, ko’alia iha ámbitu serimónia hand-over, hala’o iha ospitál referál Oé-Cusse, tersa kalan ne’e.
Luís de Jesus Neno, rekorda, Autoridade RAEOA foin hala’o serbisu iha fevereiru 2024 ne’e, kompañia atu fornese seguransa, limpeza no hahán ba fasilidade saúde sira, kontratu remata iha loron 31 dezembru 2023, maibé renova ba fulan haat hodi hein prosesu normál.
Tanba ne’e, prosesu seluk mak anúnsia prosesu tenderizasaun ba catering iha kompaña haat (4) mak konkorre, seguransa kompañia ualu (8) mak konkore bá limpeza kompañia 14 mak konkore.
“Ohin, kompañia tolu tenke prontu atubele troka tanba serbisu seguransa no serbisu limpeza labele para, apoia hahán ba pasiente sira labele para, tanba pasiente tama mai iha ospitál, tenke haan, asesu fasilidade saúde sira ho situasaun hakmatek seguru no moos, ida-ne’e mak objetivu Governu atu halo oinsa serbisu labele para,” Luís de Jesus Neno hateten.
Notísia relevante: Estoke ai-moruk iha armazein Hospital Referénsia Oé-Cusse sufisiente
Iha biban ne’e, Diretór kompañia Falo-Kaba Unip.Lda, Batista Leos, promete, durante kompañia entegra ba Governu, sei kumpre rekizitu no orientasaun husi autoridade, nune’e bele mellora serbisu iha fasilidade saúde.
“Ami sai vensedór ba projetu seguransa, ami-nia kna’ar atu asegura fasilidade saúde tomak no pesoál saúde ne’ebé serbisu iha fasilidade saúde sira, husi ospitál referál, to’o postu saúde sira iha suku 18, ha’u la garante katak, ba oin serbisu sei di’ak, tanba nu’udar kompaña foun, ne’ebé mak foin dahuluk atu kaer kna’ar serbisu seguránsa ida-ne’e, jestaun ne’ebé mak ami halo, sei esforsa no kumpre orientasaun Governu nian,” nia promete.
Nia esplika, bazea BoQ (Bill of Quantity), kompañia tama bazea planu orsamentu, husi projetu na’in-sira iha projetu ne’e, tan ne’e totál pesoál ne’ebé prepara hamutuk na’in-106, komposta husi membru na’in-100 no supervisor na’in-neen.
“Ami deside no rekruta no koloka ona iha fatin serbisu sira, no konsege koordena ho dirijente saúde nian atu define lista permanente, nune’e bele hala’o ami-nia kna’ar nu’udar kompañia seguránsa ida,” nia informa.
Fatin hanesan, Diretór kompañia Colneno Unipesoál Lda, garante sei esforsa atu mellora di’akliu-tán serbisu limpeza nian ba iha setór saúde, no espera atu promove nafatin lina koordenasaun atu kualifika serbisu limpeza iha fasilidade saúde.
“Ami agradese tebes, tanba foin akontese mak ami manán projetu ida-ne’e iha Ministériu Saúde, ami husi kompañia Colneno, ami husu de’it persiza promove liña koordenasaun no kooperasaun ba malu, nune’e bainhira ami enfrenta obstaklu ruma, Governu bele fanun ami, atu garante implementasaun serbisu la’o ho adekuadu,” nia rekomenda.
Notísia relevante:Inaugura projetu saúde tolu iha Oé-Cusse, Taur husu profisionál atende povu ho di’ak
Diretóra kompañia, Dezimar Unipesoál Lda, Tomázia da Conçeição, otimista sei serbisu hamutuk entidade hotu liu-liu dikrijénte saúde, no prontu simu krítika maibé ho konstrutivu.
“Ami sei lá ses husi salan, tan ne’e ami sei persiza nafatin ita hotu nia apoia, tanba ami kompaña mesak la forte liu, persiza serbisu hamutuk nune’e ita-nia serbisu kona-bá catering atende pasiénte sira iha hospitál di’ak serbi ba ita hotu, ami promete simu krítika no sujestaun, nune’e bele hadi’a saida mak ladi’ak bele halo di’ak liután,” nia espera.
Jornalista: Abílio Elo Nini
Editór: Evaristo Soares Martins
