OÉ-CUSSE, 29 novembru 2022 (TATOLI) – Primeiru Ministru Taur Mata Ruak, akompaña ho Prezidente Autoridade Rejiaun Administrativa Espesiál Oé-Cusse Ambeno (RAEOA), tersa inaugura projetu konstrusaun saúde hamutuk unidade tolu iha sub-rejiaun Pante Makasar.
Konstrusaun unidade tolu ne’e maka hanesan, konstrusaun armazein sentrál ba ai-motuk no ekipamentu medikamentu nian ba Oé-Cusse, konstrusaun sala izolamentu no konstrusaun laboratóriu banku de sangue ne’ebé lokaliza iha sub-rejiaun Pante Makasar.
Primeiru Ministru Taur Mata Ruak, husu profisionál saúde sira iha RAEOA atu mellora atendimentu ho kualidade no haree povu ho di’ak hodi fó tratamentu ba moras ne’ebé sofre ona.
“Ha’u-nia pedidu ba profisonál saúde sira uza másimu posivel rentabiliza ninia uzu konserva didi’ak, ita-boot sira kontinua iha kbiit nafatin tau matan ba ita-nia sidadaun sira, haree ita-nia povu ho di’ak, sira moras, sira sei mai, atu hetan tratamentu, haree sira ho di’ak,” Primeiru Ministru Taur Mata Ruak, hato’o mensajen ne’e iha ámbitu inaugurasaun ne’e.
Xefe Governu afirma, ospitál, postu saúde no klínika sira hanesan sentru ba ema, atu trata moras, klaru prinsipíu Ministériu Saúde, ho nia filozofia maka prevene la’ós kura, entaun ne’e signifika inklui mós edukasaun tau matan ba ita-nia sidadaun sira-nia saúde, hahú kedas kiik oan to’o boot.
“Ohin loron iha mundu akontese moras oinoin, karik ida-ne’e akontese, ita iha kedas ona fasilidade sufisiente fó hakbiit profisionál sira halo atendimentu, tanba ha’u fiar Oé-Cusse iha doutór profisionál natoon atu fó atendimentu ba ita-nia inan-aman sira,” nia akresenta.
Prezidente Autoridade RAEOA, Arsénio Paixão Bano, relata relatóriu kona-bá fasilidade iha RAEOA durante tinan rua, 2021 to’o tinan ne’e konsege konstrui ona fasilidade saúde hamutuk 12 ne’ebé uza Orsamentu Jerál Estadu (OJE) no fundu COVID-19 ne’ebé hetan apoia hosi Ministériu Saúde.
“Konstrusaun ba fasilidade saúde unidade tolu ne’e konklui ona 100%, tán ne’e ohin ami konvida Primeiru Ministru ita hamutuk sai sasin ba fasilidade saúde ne’e,” nia afirma.
Fasilidade saúde hamutuk unidade 12 ne’ebé Autoridade RAEOA konstrui dezde tinan kotuk to’o ohin maka hanesan, fasilidade ba sentru kuarentena hamutuk unidade lima lokaliza sira iha sub-rejiaun haat.
Postu saúde no rezidénsia ba profisionál saúde konstrui iha aldeia Tumin, suku Bobometo, no unidade neen seluk, maka konstrui iha sub-rejiaun Pante Makasar, hanesan klínika ba moras TBC, konstrusaun ba Unidade Internamentu Kuidadu Saúde (ICU).
Nune’e konstrusaun armazein sentrál, konstrusaun sala izolamentu no mós konstrusaun laboratóriu banku de sangue ho totál orsamentu hamutuk millaun $1-resin.
Entretantu, konstrusaun armazein sentrál ba ai-moruk no konsumiveis médiku seluk iha Santa Rosa, suku Costa, sub-rejiaun Pante Makasar, ezekuta hosi empreza Fitun Sanane Unipesoál Lda, ho valór kontratu $427,615.95, konstrusaun Sala Izolamentu iha Hospitál Referál Oé-Cusse ezekuta hosi empreza Erihjocia Unipesoál Lda, ho valór kontratu $288,082.66.
No mós konstrusaun edifísiu laboratóriu no banku de sangue iha Hospitál Referál Oé-Cusse, ezekuta hosi empreza Dinhola Unipesoál Lda, ho valór kontratu $210,742.43.
Notísia relevante: RAEOA aloka millaun $1-resin konstrui fasilidade saúde públika
Jornalista: Abílio Elo Nini
Editór: Evaristo Soares Martins
