PNTL rejista asidente tráfegu 50-resin iha semana ikus ne’e
DILI, 22 Janeiru 2026 (TATOLI)—Polísia Nasionál Timor-Leste (PNTL) liuhusi Diresaun Tránzitu Seguransa Rodoviária rejista asidente tráfegu 50-resin iha semana ikus.
“Asidente tráfegu iha dia 12 to’o dia 18 rejista kazu ema kanek todan hitu, ema kanek kma’an 48, laiha ema mate,” Portavós Ministériu Interiór, Superintendente Asistente Polísia Mouzinho Correia, hato’o ba Jornalista sira iha Ministeriu Interiór, Vila-Verde Kinta ne’e.
Iha biban ne’e, Komandante relata katak PNTL monitoriza movimentu transporte sira ne’ebé tama no sai iha pontu entrada, hahú husi loron 12 to’o 18 Janeiru movimentasaun veíkulu liuhusi Postu Fronteira sira hanesan Batugade, Salele, Sakato, Oesilo konsege arrekada reseita $3.015.
Notísia relevante : Komisaun E sujere ba DNTT tau sinál tránzitu iha área risku ba asidente tráfegu
Veíkulu sira kompostu husi estranjeiru hamutuk 188, veíkulu pezadu ho totál 102, no veíkulu lizeiru 86.
Nia dehan, PNTL mós rejista kazu violénsia doméstika hamutuk 17 hahú husi loron 12 to’o 18 Janeiru, kazu asaltu iha 17, kazu furtu iha lima 5, kazu asaltu seksuál iha tolu, no estragu ba propiedade iha rua.
Kazu ofensa ba integridade simples iha 19, iha kazu maus tratus ba konjuje iha hitu, furtu agravadu haat, danu ho violénsia tolu no danu simples tolu.
Komandante Mouzinho mós hateten, bazeia ba relatóriu husi Komandu Munisípiu sira iha territóriu nasionál hahú husi loron 12 to’o 18 Janeiru, katak situasaun seguransa nasionál jeralmente la’o di’ak, maski akontese insidente no asidente balun maibé la perturba situasaun orden públiku iha rai-laran.
“Situasaun ne’e konsidera estável tanba esforsu husi Autoridade Seguransa, ne’ebé serbisu hamutuk ho homunidade, joven, estundante no ema hotu. Sidadaun Timor-Leste nomós maluk sira husi rai-li’ur. Situasaun Jerál seguransa iha rai-laran iha períodu referidu mezmu iha insidente no asidente balun ne’ebé akontese iha territóriu nasionál maibé estável,” nia katak.
Jornalista : Natalino Costa
Editora : Julia Chatarina
