DILI, 22 Janeiru 2026 (TATOLI)—Polísia Nasionál Timor-Leste (PNTL) submete ona kazu abuzu sexuál ne’ebé envolve suspeitu na’in-lima hasoru sidadaun feto ho inisiál FCL (16), ba Ministériu Públiku (MP).
Suspeitu na’in-lima ne’e mak hanesan CON (19), JMPA (18), JGFPS (17), GAP (19), enkuantu JPR (18) daudaun eskola iha Indonézia.
“Kazu ne’ebé akontese durante semana ida-ne’e nia laran, hanesan agora virál iha rede sosiál, atu hateten katak kazu ne’e Komandu Munisípiu Dili no VPU (Vulnerable Persons Unit) halo intervensaun no remete ona bá Ministériu Públiku,” Portavós Ministériu Interiór (MI), Superintendente Asistente Polísia Mouzinho Correia hateten ba Jornalista sira iha edifísiu MI, iha Vila-Verde, Kinta ne’e.
Notísia relevante : PNTL identifika joven na’in-haat suspeitadu halo abuzu sesuál hasoru feto ida
Aleinde ne’e, prosesu ne’e rejista ona ho Númeru Uniku Kriminál (NUC) 0017/26-DI-NFTL.
“Suspeitu ita identifika ona hamutuk na’in-lima agora na’in-haat mak ita halo prosesu, enkuantu suspeitu na’in-ida daudaun ne’e iha ona Indonézia. Ita sei komunika ho ita-nia Adidu Seguransa iha Indonézia hodi lori nia fila submete ba prosesu,” nia akresenta.
Portavós dehan, tanba kazu ne’e la priense fraglante Delitu, maka Polísia uza forsa hodi halo de’it identifikasaun ba suspeitu na’in-haat.
“Suspeitu na’in-haat ita halo ona prosesu iha loron 20 Janeiru 2026 no ita remete ona ba Ministériu Públiku,” nia katak.
Tuir Portavós, Polísia la presiza bolu suspeitu sira-nia inan-aman tanba krime ne’ebé suspeitu sira komete hanesan reponsabilidade pesoál.
“Ita tenke separa problema individuu, labele kahur exeptu kazu minoridade, ne’e ita bolu nia inan mai, maibé reponsabilidade kriminál la’ós ba fali nia inan-aman,” Mouzinho esplika.
Mouzinho hatutan, Polísia daudaun ne’e asegura ona vítima iha fatin seguru.
Iha sorin seluk, Komandante PNTL Munisípiu Dili, Superintendente Xefe Polísia Orlando Gomes, hateten, Polísia halo ona identifikasaun ba suspeitu na’in-haat maibé hein mandadu atu detein.
“Aprezenta ona ba Ministériu Públiku. Hein mandadu detensaun,” nia afirma.
Jornalista : Natalino Costa
Editora : Julia Chatarina
