DILI, 23 Janeiru 2026 (TATOLI)—Ministru Obra Públikas, Samuel Marçal, informa ba tinan 2026 ne’e Governu prevee orsamentu fundu infraestrutura millaun $20 ba reabilitasaun estrada urbana iha Dili laran, maibé bainhira estimasaun la to’o sei uza fali fundu fleksibilidade nian.
Notísia Relevante: Governu hahú sobu ponte Maufelu atu konstrui fali ponte foun
“Alargamentu estrada sei kontinua implementa iha movimentu sira-ne’ebé mosu engrafamentu no espasu estrada kloot, signifika sei mellora tan prosesu alargamentu iha parte balun ne’ebé identifikadu ona,” Ministru Samuel informa ba jornalista sira iha Bekora, ohin.
Prosesu alargamentu pakote tuir mai mak sei hahú husi Hospitál Nasionál Guido Valadare (HNGV) tuun to’o ba dirasaun igreja Katedral nian, pakote daruak sei kontinua fali husi dirasaun Mandarin ba to’o rotunda Nicolau Lobato Comoro, no pakote datolu mak sei hahú husi semáforu Eletrisidade Timor-Leste (EDTL) nia oin sa’e to’o ba Balide no sei kontinua alarga tun ba Kuluhun.
“Ita sei haree took bainhira tempu sei iha, ita sei halo alargamentu mós husi parte tasi-ibun no iha Hudi Laran nian. Ne’ebé presiza hadi’a estrada, trotoar no mós estabelese estasionamentu transporte públiku, tamba ita-nia espasu estrada luan hela maibé fatin estasionamentu laiha ne’e mak halo transporte sira okupa hotu espasu estrada nian halo kloot,” nia esplika.
Tanba ne’e, nia dehan, Governu presiza prepara dezenu didi’ak hodi garante minimiza engrafamentu iha sidade Dili no estasionamentu ne’e mós bele rekolla reseita ba kofre Estadu.
Entretantu, iha tinan ida-ne’e, dezenvolvimentu infraestrutura aleinde iha kapitál Dili maibé sei mellora mós ba munisípiu seluk hanesan iha Aileu, Ermera, Baukau, Ainaru, Manufahi, sei foka ba tipu projetu estrada, ponte drainajen no moru protesaun.
Jornalista : Alexandra da Costa
Editór : Cancio Ximenes
