DILI, 23 Janeiru 2026 (TATOLI)—Governu liuhusi ekipa konjunta husi Ministériu Obra Públika no Sekretária Estadu Asuntu Toponímia no Organizasaun Urbana, sesta ne’e, orienta ekipa téknika husi Empreza Montana Diak hodi hahú sobu ponte Maufelu atu halo konstrusaun foun ba ponte ne’e.
Notísia Relevante: Governu halo diálogu ho komunidade afetadu ba alargamentu estrada iha Bekora
Atividade ne’e akompaña direta husi Primeiru-Ministru, Kay Rala Xanana Gusmão, hodi halo rituál kulturál antes sobu ponte refere.
Ministru Obra Públika, Samuel Marçal, hateten konstrusaun ponte ne’e sira planeia uluk kedas tanba kada tinan ne’e trafegu aumenta ba beibeik no sedimentasaun okupa hotu mota laran halo ponte ne’e sai badak no afeta ba inundasaun, nune’e presiza deside kedas agora hodi halo alargamentu.
“Prosesu alargamentu ida agora ne’e baratu liu tanba kuaze komunidade hotu-hotu nia uma iha dalan ninin ne’e temporáriu de’it ka seidauk iha uma permanente, entaun kustu ba indemnizasaun alargamentu ne’e sei fasil liu duké ita hein to’o tinan 10 mai ne’e imposivel tebes,” Ministru Obra Públika ne’e informa ba jornalista sira iha Ponte Maufelu, ohin.
Governante ne’e dehan, prosesu sira-ne’e hotu bele minimiza ona engrafamentu no tráfegu aleinde ne’e bele fó espasu mós hodi kontrui estrada fly way, nune’e ohin sira hahú sobu ona ponte ne’e no tuir loloos sobu iha tinan kotuk maibé tanba laiha kooperasun ho komunidade balun hodi lori tempu tinan ida foin kontinua sobu.
“Projetu ne’e integradu ida hahú husi konstrusaun ponte Maufelu, sei estabelese mós estasionamentu ba transporte, halo trotoar para ema la’o-ain hodi halo movimentu ba-mai, hadi’a drainajen bee-moos nian iklui monta liña eletrifikasaun iha rai okos hodi rezolve problema ahi mate. Aleinde konstruzaun ponte ne’e konklui ona sei kontinua prosesu konstrusaun ponte Bekora,” nia hateten.
Nia hatutan, tanba Timor-Leste sai ona membru ASEAN entaun Timor-Leste mós tenke hatudu katak nu’udar nasaun soberanu presiza hadi’a dezenvolvimentu infraestrutura, atu fasilita ema timoroan tantu estranjeiru bele asesu ho di’ak.
Governu Konstitusionál da-sia (IX) konstrui foun fali ponte ne’e ho ninia medida luan metru 24, naruk pakote dahuluk metru 20, iha pakote spam daruak okupa metru 10, ne’e konstrui husi Empreza Arquiris no Karya Timor-Leste ho durasaun tempu tinan ida. Kona-ba estimasaun orsamentu seidauk iha, tanba sei hein rezultadu verifikasaun husi ADN.
Antes ne’e, ponte Maufelu tuan ne’e konstrui iha tempu okupasaun Indonézia ne’ebé konstrui husi Empreza Suzuki iha 16 Abríl 1979 no ramata iha 10 Agostu 1979, no Governadór Provínsia Timor Timur, Guilherme Maria Gonçalves, iha 17 Agostu 1979.
Jornalista : Alexandra da Costa
Editór : Cancio Ximenes
