CET realiza simpóziu nasionál hodi hametin fiar tuir valór evanjéliku Igreja Katólika
DILI, 01 Agostu 2026 (TATOLI)–Konferénsia Episkopál Timorense (CET-sigla portugeza) realiza simpóziu nasionál ho tema “Moris tuir Valór Evanjéliku iha Moris Polítika, Sosiál no Ekonómika”, ho objetivu atu halo reflesaun hamutuk kona-ba papél prinsípiu étiku-kristaun sira iha dezenvolvimentu sustentavel no justu ba nasaun.
Iha atividade simpóziu ida-ne’e sei iha konferénsia no diskusaun ho oradór prinsipál sira liuliu kardeál Peter Kodwo Appiah Turkson, ne’ebé nu’udár Konsilleiru ba Pontifísia Akademia Siénsia Vatikanu.
Prezidente konferénsia Episkopál Timoroan, Don Virgílio Kardeál do Carmo da Silva, hato’o agradesimentu ba oradór prinsipál ne’ebé marka ona prezensa iha simpóziu nasionál ida-ne’e hodi fahe koñesimentu no halo reflesaun kle’an kona-ba importánsia husi tema ne’ebé eziste.
“Ho ida-ne’e, ita bele asegura katak koñesimentu no hanoin naruk ne’ebé sei hato’o husi oradór prinsipál sei to’o no fó naroman ba ita hotu nia laran no hanoin,” Arsebispu deklara iha atividade simpóziu nasionál ne’ebé hala’o iha Salaun multiuzu GMN, Bebora, Sábadu ne’e.
Tuir nia katak oradór prinsipál iha ninia matenek no esperiénsia kle’an kona-ba doutrina sosiál igreja nian.
“Ami fiar katak ita-boot nia reflesaun sei fó naroman ba ami atu komprende di’ak liután tema simpóziu ida-ne’e, liuliu komprensaun kona-ba papél importante igreja nian iha moris sosiál, polítika no ekonómika iha rai Timor-Leste,” Kardeál subliña.
Líder Igreja Katólika Timor-Leste ne’e dehan doutrina sosiál igreja nian mak hamutuk husi ensinamentu sira-ne’ebé ajuda sarani sira lee evangellu tuir realidade konkreta sira-ne’ebé sosiedade enfrenta, hanesan ki’ak, dezigualdade no problema sosiál seluk.
“Entaun, doutrina sosiál igreja sai xave interpretasaun sira-ne’ebé halo diálogu entre siénsia no konxiénsia, hodi fó kontribuisaun importante ba koñesimentu, esperansa no dame,” Amu-Lulik ne’e esplika.
Nune’e, nia husu ba líder katóliku sira no ema hotu ne’ebé simu responsabilidade atu foti desizaun ba komunidade no ba bein-komún tenke halo ho valór evanjéliku, sai hanesan bússola (guia) ne’ebé orienta sira.
Tanba iha sosiedade ida-ne’ebé dala barak hasoru influénsia husi hanoin ne’ebé la klaru no individualizmu, Bispu hateten, presiza tebes líder íntegru sira atu sai ezemplár moris no bele lori ema sira-ne’ebé iha sira-nia responsabilidade atu moris ho loloos tuir sira-nia vokasaun rua hanesan sidadaun di’ak no hanesan kristaun fiél.
“Igreja kontinua hala’o nia misaun edukativa prinsipál liuhusi formasaun no akompañamentu kontinua ba fiél sira atu bele realiza valór evanjellu iha moris lorloron nian,” nia reforsa.
Enkuantu iha tempu ida-ne’ebé Timor-Leste enfrenta dezafiu boot sira iha prosesu konsolidasaun instituisaun, dezenvolvimentu ekonómiku no justisa sosiál, nia hatutan, nune’e iha simpóziu ida-ne’e konvida ema hotu (liliu sarani sira) atu halo reflesaun kle’an no inspiradora hodi moris tuir valór evanjéliku.
Jornalista: Alexandra da Costa
Editór: Xisto Freitas da Piedade
