Banku Sentrál hein promulgasaun lei atu hahú prosesu estabelesimentu BNDTL

DILI, 03 Agostu 2026 (TATOLI)-Governadór Banku Sentrál Timor-Leste, Helder Lopes, hatete katak prosesu kriasaun Banku Nasionál Dezenvolvimentu Timor-Leste (BNDTL) daudaun hein de’it promulgasaun Lei Rejime Jerál Sistema Finanseiru no Atividade Bankária husi Prezidente Repúblika, José Ramos-Horta.

Governadór dehan Parlamentu Nasionál aprova ona lei ne’e, no bainhira Xefe Estadu promulga, Governu bele prepara kandidatura ba Banku Sentrál atu hetan lisensa estabelesimentu banku ne’e.

“Lei iha ona, kapitál mós Governu tau ona iha Orsamentu Jerál Estadu. Governu hahú prosesu rekrutamentu ema servisu iha Banku Nasionál Dezenvolvimentu Timor-Leste. Ami hein de’it bainhira lei iha, Governu hatama nia kandidatura, ami prosesa Banku Dezenvolvimentu ne’e bele estabelese. Espera katak kréditu bele di’ak liután para muda ita-nia ekonomia”, Helder Lopes hatete iha Ministériu Finansa, ohin.

Nia dehan daudaun BCTL hein de’it prosesu sira ne’ebé la’o, tanba atu estabelese banku, Governu presiza hatama proposta no BCTL avalia no garante katak sira tenke prienxe rekizitu legál sira antes fó lisensa.

Tuir nia, normalmente BCTL avalia kapasidade finanseira, estrutura jestaun, planu negósiu, no rekursu umanu. Maibé ba BNDTL, kapitál inisiál Governu prepara ona liuhusi orsamentu Estadu.

“Daudaun ita nafatin hamutuk ho Governu halo koordenasaun di’ak, tanba ida-nee programa Estadu, ne’ebé ita tenke suporta”, nia dehan.

Lembra katak iha loron 08 Jullu, Prezidente Komisaun C iha Parlamentu Nasionál, ne’ebé trata Asuntu Finansa Públika, Cedelízia Faria dos Santos, hateten bainhira proposta-lei númeru 22/VI(2a) kona-ba Rejime Jerál Sistema Finanseiru no Atividade Bankária hetan ona aprovasaun no promulgasaun sei fó oportunidade ba Governu halo prosesu tomak hodi estabelese BNDTL.

Cedelízia esplika katak proposta lei ne’e importante tanba durante ne’e Timor-Leste uza de’it regulamentu husi UNTAET atu regula sitema finanseiru no atividade bankária. Proposta lei foun ne’e regula asuntu importante, inklui prevensaun brankeamentu kapitál, kombate osan falsu, organizasaun sistema banku sira, kapitál mínimu atu harii banku, ne’ebé determina montante mínimu millaun $25.

Notisía relevante: Aprovasaun Rejime Jerál Sistema Finanseiru permite Governu harii BNDTL

Jornalista: Arminda Fonseca  

Editora: Maria Auxiliadora