BOBONARU, 22 Janeiru 2026 (TATOLI)-Prezidente Tribunál Rekursu (TR), Afonso Carmona, entrega ofisialmente dokumentu ba empreza Jiangsu Zhuoxu Construction Co., Lda., joint venture ho Yongling Holding Unipessoal Lda., hodi fó sinál verde ba inísiu obra konstrusaun edifísiu Tribunál Judisiál Primeira Instánsia Munisípiu Bobonaru, ho totál orsamentu $4.444.363,60.
Projetu ne’e hanesan polítika estratéjika ba dezenvolvimentu iha setór justisa hodi espande nia servisu judisiál iha munisípiu Bobonaru.
Edifisíu ne’e hamriik atu sai hanesan símbolu ida katak tribunál nia servisu iha setór judisiál besik daudaun ona ba povu atu garante sira-nia direitu no asegura justisa ne’ebé hanesan ba ema hotu iha baze.
Notísia relevante: TR prevee millaun $4-resin konstrui Tribunál Primeira Instánsia iha munisípiu tolu
“Ita koko atu realiza [konstrusaun ba] tribunál ida iha ne’e. Ita mai iha ne’e atu iha konfiansa husi povu, katak justisa iha duni, tanba tribunál komesa harii ona iha ne’e”, Afonso Carmona hateten iha ámbitu entrega dokumentu, iha Maliana, ohin.
Prezidente Autoridade Munisípiu Bobonaru, Paulo Moniz Maia, konsidera obra ne’e hanesan pasu ida hodi adianta jornada ba prosesu dezenvolvimentu justisa iha Timor-Leste, espesialmente iha Bobonaru.
Tuir nia, ho konstrusaun ida-ne’e sei garante servisu justisa ne’ebé besik liután ba komunidade hodi hetan justisa ba problema ne’ebé sira enfrenta no garante mós boa-governasaun, inklui tane aas direitu demokrátiku.
“Ho ezisténsia [tribunál] ne’ebé besik garante liután konfiansa sentrál iha prosesu desentralizasaun administrativa lokál no tane aas Estadu direitu demokrátiku no bele garante parseiru dezenvolvimentu sira-nia konfiansa hodi investe iha ita-nia rai, liuliu iha munisípiu Bobonaru”, dehan.
Iha sorin seluk, Segundu Komandante PNTL Munisípiu Bobonaru, Superintendente Asistente José Casemiro de Carvalho, realsa katak ezisténsia tribunál ne’e bele tulun no hakmaan servisu autoridade seguransa nian.
“Kuandu ligadu ho prosesu bá Suai, ami dada-iis, tanba estrada, maibé ho edifísiu ida-ne’e, kuandu finaliza bele kontribui ba ami PNTL ho sira ne’ebé servisu iha tribunál”, nia dehan.
Asisten Diretór-Ezekutivu Jiangsu Zhuoxu Construction Co., Lda., joint venture ho Yongling Holding Unipessoal Lda., Boang Xu, komprometidu ezekuta obra ida-ne’e ho responsabilidade, liuliu garante nia kualidade.
“Obrigado ba Governu Timor-Leste no povu Bobonaru ba apoiu. Ida-ne’e onra ida mai ami atu kontrubui no harii infraestrutura sira liuhusi fornese servisu no apoia ne’ebé profisionál”, nia afirma.
Iha ámbitu entrega dokumentu ne’e, lia-na’in sira husi suku Holsa mós halo serimónia rituál hodi husu lisensa ba lulik no natureza, nune’e empreza konstrutora bele ezekuta konstrusaun edifísu ho andar ida, rezidénsia tolu ba juis sira ne’e ho susesu.
Serimónia ne’e remata empreza hahú mobiliza ekipamentu no traballadór sira atu ezekuta projetu ne’e dentru loron 365.
Notísia relevante: TR sei loke tan Tribunál iha munisípiu tolu
Jornalista: Sergio da Cruz
Editora: Maria Auxiliadora
