MP autoriza PNTL detein suspeitu na’in-haat halo abuzu sexuál hasoru feto

January 23, 2026
11:10 AM
Facebook Instagram X WhatsApp Telegram

*Polísia asegura suspeitu-haat ne’ebé envolve kazu abuzu sexuál, iha Kamandu PNTL Munisípiu Dili, Kaikoli, Sesta (23/01/2026). Imajen TATOLI/Natalino Costa*

DILI, 23 Janeiru 2026 (TATOLI)–Ministériu Públiku (MP) liuhusi Prokuradór Titulár autoriza ona Komandu Polísia nasionál Timor-Leste (PNTL) Munisípiu Dili atu ezekuta mandadu husi Tribunál Judisiál Primeira Instánsia Dili (TJPID) atu halo kapturasaun hodi detein suspeitu sira ne’ebé halo abuzu sexuál ho sidadaun feto ida ho inisiál FCF.

Suspeitu na’in-haat mak hanesan CON (19), JMPA (18), JGFPS (17), GAP (19), enkuantu suspeitu JPR (18) daudaun eskola iha Indonézia.

“Mandadu detensaun sai ona, kona-ba kazu violasaun sexuál,” Komandante Munisípiu Dili, Superintendente Xefe Polísia Orlando Gomes informa ba Ajénsia TATOLI via telefónika, Sesta ne’e.

Notísia relevante : PNTL submete kazu abuzu sexuál ne’ebé envolve husi suspeitu na’in-lima

Nune’e, Seksaun Servisu Investigasaun Kriminál no Polísia Komandu PNTL Munisípiu Dili inklui Vulnerable Persons Unit (VPU) halo kapturasaun no asegura hela suspeitu sira.

“Sira ba ona halo kapturasaun, depois kapturasaun mai ita halo kedan detensaun ba sira,” nia akresenta.

Jornalista : Natalino Costa

Editora : Julia Chatarina