DILI, 26 Janeiru 2026 (TATOLI) – Konstrusaun ró peska, 5 Gross Tonnage, husi empreza timoroan, Caviq Construction Lda., iha Indonézia, kuaze konklui no entrega ba Governu iha tinan ne’e.
Sekretáriu Estadu Peska, Domingos dos Santos, hateten konstrusaun ró ho montante rihun $80 ne’e falta de’it mak monta nia mákina.
“Loloos ne’e kompañia entrega iha fulan-Dezembru 2025, maibé tanba mákina ró nian mak seidauk hetan, nune’e sira muda mai tinan ne’e, no empreza kompromete sei entrega ba Governu”, Domingos dos Santos dehan ba Tatoli iha Komoro, Dili.
Konstrusaun ró 5 Gross Tonnage ne’e hanesan pilotajen ida ba ministériu atu sukat kapasidade ró nian ba iha atividade peska nian iha tasi kle’an kada loron, semana, fulan, no tinan, hodi komersializa no hetan rendimentu hira.
Tuir nia, husi ida-ne’e mak sai baze análize ida no ba oin mak nia rezultadu di’ak sei aumenta ró ida hodi halo atividade peska nian, tanba ró ki’ik ne’ebé durante distribui ba peskadór sira ne’e labele halo atividade to’o tasi kle’an sira.
“Governu konstrui ró labele halo kedas husi boot, maibé hahú husi natoon hodi sukat ita-nia kapasidade mak konstrui to’o boot”, dehan.
Bainhira ró ne’e mai Timor-Leste, tékniku Diresaun-Jerál Peska mak sei jere hodi halo operasaun, nune’e bele hatene nia kapasidade peska molok fó ba empreza seluk.
Notisía relevante: MAPPF aloka rihun $80 ba konstrusaun ró peska ida
Jornalista: Arminda Fonseca
Editora: Maria Auxiliadora
