Lansa Projetu Estrada Glenu-Letefoho, PM Xanana : Imi hein kleur duni
ERMERA, 25 Janeiru 2026 (TATOLI) – Primeiru-Ministru Timor-Leste, Kay Rala Xanana Gusmão, subliña, povu hein kleur ona ba dezenvolvimentu infraestrutura bázika, partikularmente estrada no ponte sira, ne’ebé esensiál ba dezenvolvimentu setór hotu-hotu.
Deklarasaun ne’e PM Xanana hato’o durante asina kontratu ba projetu Estrada Urbana Glenu no Estrada Gleno-Letefoho iha EBC Eraulu, Postu Letefoho, Segunda ne’e.
Iha nia diskursu, PM Xanana haktuir katak, konstrusaun ba estrada sira ne’e nu’udar kontinuasaun ba planu governu nian ne’ebé aprova iha 2010 no 2011, ho meta implementasaun to’o 2030.
“Buat importante ida mak infraestutura bázika atu desenvolve setór hotu mak estrada no ponte, agora mak povu sente rasik noaita temi bázika ne’e katak sai aleserse ba desenvolvimentu, bainhira estrada tama to suku no aldeia labarik bele lao ba eskola ho diak,” dehan PM Xanana.
Nia subliña importánsia esperansa nian iha prosesu dezenvolvimentu. “Imi hein kleur duni lo’os, iha tinan kotuk igreja fohatene ba ita katak esperansa la bosok ne’e duni iha difikuldade oinsa ba mos sei iha esperansa mak ida ne’e sei la bosok imi, tanba iha tinan 24 nia laran ho difikuldade oin-oin no barak tebes, mate, terus hamlaha, moras, kilat musan, kadeia maibé esperansa la bosok no tinan 24 ita iha duni ukun aan.”
Primeiru-Ministru Xanana subliña mós responsabilidade governu no autoridade lokál sira nian, hodi fó hanoin katak sira-nia knaar la’ós atu buka benefísiu pesoál, maibé atu serbí povu ho di’ak.
“Povu nia osan ne’e sosa ho ita nia ran no ruin, tanba ne’e tenke gasta ho kualidade,” nia realsa.
Nia hatutan, dezenvolvimentu tenke inklui edukasaun, desportu, no konsiensia ambiente ba jerasaun foun sira.
Kontratu projetu estrada ne’e asina husi Ministru Obras Públikas, Samuel Marçal, no reprezentante kompañia, ho sasin inklui Primeiru Ministru Xanana, reprezentante Banku Mundial, David Freedman, Prezidente Munisípiu Ermera, José Martinho, no komunidade lokál.
Projetu Estrada Glenu-Letefoho, ho númeru kontratu TENDER/191/MOP – 2024, sei hale’u husi Letefoho (km 30+230) to’o Gleno (km 54-370). Konstrusaun ne’e sei hala’o durante loron 365 ho orsamentu US$38.800.054.00, no sei hala’o husi China Civil Engineering Construction Corporation (Xina).
Liután, konstrusaun Estrada Urbana no Drenajen fahe ba pakote rua: Pakote 1 ho orsamentu US$2,640,762,21 no Pakote 2 ho orsamentu US$3,214,929,67, ne’ebé hala’o husi Shabryca Construction UNIP.LDA.
Primeiru-Ministru Xanana hato’o ninia esperansa katak projetu ida-ne’e sei remata tuir tempu no lori benefísiu signifikativu ba komunidade nia bem-estar, enkuantu subliña importánsia husi dixiplina, kuidadu ambiente, no partisipasaun ativu komunidade nian iha dezenvolvimentu nasionál.
Jornalista: Cidalia Fátima
Editora: Armandina Moniz
