KOVALIMA, 26 Janeiru 2026 (TATOLI) – Reprezentante Ministériu Edukasaun (ME), Olidia das Dores Marins, Prezidente INFORDEPE, hamutuk ho Autoridade Munisípiu Kovalima husu misa agradesimentu relasiona vizita illas São João Paulu II durante tinan ida iha munisípiu Kovalima.
Padre Vigáriu Pároku Suai , Zacarias Amaral Soares, haklaken iha nia omilia katak illas São João Paulu II hanesan padrueira edukasaun ni’an, nune’e ho nia vizita bele haraik matenek, badinas no etika morál di’ak ba estudante no sarani sira iha Kovalima.
“Ita Kovalima-oan selebra misa abertura ba vizita São João Paulu II hanesan padruera edukasaun Timor-Leste ni’an, nune’e edukasaun Kovalima simu reponsabilidade ba vizita illas ne’e. Ita halibur malu iha ne’e hasa’e misa agradesimentu hodi husu misa hodi harohan deit ba Maromak atu haraik mai ita matenek badinas, etika morál di’ak, haraik mai ita kritika ne’ebé konstrutivu no edukativu no sai ema ne’ebé ezemplár,” Padre Vigáriu Pároku ne’e haklaken iha misa abertura iha Igreja Ave Maria Suai, ohin.
Misa agradesimentu, Padre hatutan evanjelu ohin haklaken katak: “Imi mak masin no imi mak naroman” oinsa mak bele sai masin ba ema seluk no sai naroman ba ema seluk hanesan pergunta simple ba sarani ida-idak no dezafia entidade edukasaun iha Kovalima.”
Nune’e, Amu dirijente ne’e husu ba sarani Kovalima-oan: “Ita hotu fo liman ba malu kolabora no hanesan reponsabilidade ida oins sai masin no roman ba ema seluk ne’e maka dalan úniku tenke hasai didi’ak responsabilidade no obrigasaun hodi hanorin hanesan profesór no alunu presiza estuda badis atu lee barak ne’e mak dalan ikus halo ita sai masin no naroman,” nia dehan
Ho prezensa illas São João Paulu II, Kovalima-oan tenke hatudu seriedade no maturidade hodi prepara jerasaun foun nia mentalidade ne’ebé di’ak atu ativu, kreativu no inovativu.
Iha fatin hanesan, Reprezentante Ministériu Edukasaun (ME), Olidia Das Dores Martins, ho onra no ho sentidu responsabilidade hodi entrega illas São João Paulu II hanesan mahein ba edukasaun husi Rejiaun Administrativa Espesiál Oekusi Ambeno (RAEOA ) mai iha Kovalima.
“Illas São João Paulu II hanesan sasan fundamental maibé hanesan sinál ba kompromisu hamutuk entre edukasaun no fe entre matenek akademiku no formasaun morál, nune’e illas São João Paulu II sai ezemplu iha prosesu aprendijazen,” nia afirma.
Istória illas São João Paulu II
Illas São João Paulu II sai hanesan mahein ba edukasaun iha 1989 santu padre São João Paulu II vizita istóriku mai Timor-Leste hanesan provinsia badala 27 ho naran provinsia Timur-Timur ne’ebé perténsia ba Indonézia, maibé daudaun hetan independénsia ho naran Timor-Leste ne’ebé tau metin nia mensajen iha sira-nia fuan mak imi mak “Masin no Naroman” hodi fanun timor-oan hotu katak edukasaun mak sai fundamentu atu harii futuru ho dame, dignidade, esperansa no responsabilidade .
Iha tinan-2019, Ministériu Edukasaun hili São João Paulu II hanesan padrueira ba edukasaun iha Timor-Leste hahú husi ensinu pre-eskolár to’o ensinu sekundáriu no Tékniku Vokasionál hodi hasa’e no haforsa devosaun mak ME lori illas São João Paulu II sirkula ba eskola sira iha munisípiu ida-idak.
Iha loron 14 janeiru 2019, hahú misa ba dahuluk ne’ebé prezide husi Don Virgilio Cardeál do Carmo, iha jornada pregrinasaun vizita São João Paulu II iha eskola sira iha Munisípiu Dili hahú husi enzinu báziku no tekniku vokasionál durante tinan ida.
Iha 2020 , Munisípiu dili entrega fali ba Manufahi durante tina-rua iha Manufahi tanba pandemia Kovid-19 , Iha Fevereiru 2022 mak Manufahi entrega ba Ainaro.
Iha fulan-Fevereiru 2023, Ainaro entrega ba Aileu. Iha Fevereiru 2024 Aileu entrega ba Ermera no iha Fevereiru 2025 Ermera entrega ba RAEOA, nune’e Dioseze Dili entrega mai iha Dioseze Maliana hodi hahú iha Kovalima.
Notisia relevante:Sarani-sira iha Kovalima simu illas São João Paulo II husi RAEOA iha Fronteira Salele
Jornalista: Celestina Teles
Editór: Florencio Miranda Ximenes
