PNTL detein ona suspeitu na’in-haat liga ho konfrontu iha Tibar
DILI, 26 Janeiru 2026 (TATOLI)—Polísia Nasionál Timor-Leste (PNTL) Munisípiu Likisá detein ona suspeitu na’in-haat liga ho konfrontu husi grupu balun, ne’ebé akontese iha Tibar, iha Domingu kalan (25/01).
Suspeitu sira ne’ebé Polísia detein ona iha sela Komandu PNTL Munisípiu Likisá mak hanesan SBdS, DRDM, MdFG, no SdS.
“Orsehik, Domingu tuku 19:00 kalan akontese konfrontu entre grupu Kolimau 2000 ho komunidade área Tibar, husi konflitu ne’e rezulta karreta balun hetan estragus, uma tolu hetan estragus no uma ida hetan sunu. Hafoin ne’e Polísia detein suspeitu na’in-haat,” Diretór Nasionál Servisu Investigasaun Kriminál, Suprintendente Polísia João Belo dos Reis, informa ba Jornalista sira iha ninia knaar fatin, Komandu Jerál PNTL Kaikoli, Segunda ne’e.
Autoridade Seguransa iha kestaun ne’e rekolla ona evidénsia hanesan samurai no tudik ne’ebé suspeitu sira lori hodi asalta malu.
Superintendente Polísia esplika, Grupu Kolimau husi Dili bá partisipa inaugurasaun gruta iha Raiheu, bainhira sira fila mak hakilar komunidade iha Tibar nune’e komunidade lokál la simu hodi mosu konfrontu.
“Kazu iha Tibar sei iha prosesu hela, suspeitu ne’ebé mak envolvidu ami sei buka tuir hotu hodi responsabiliza ba aktu sira ne’ebé sira halo,” nia akresenta.
Notísia relevante : Konfrontu iha Suku Afaloikai, autoridade orienta suspeitu responsabiliza abitante nia uma ne’ebé estragadu
Nune’e, Diretór ne’e husu ba parte Investigasaun Komandu PNTL Likisá hodi rekolla informasaun no halo relatóriu ba Komandu Jerál hodi identifika estragu sira.
Nia dehan, daudaun ne’e situasaun iha área Tibar kontroladu tanba bainhira akontese konfrontu ne’e, Unidade Espesiál Polísia liuhusi Batallaun Orden Públika (BOP) dezloka kedan ba fatin hodi fó apoiu ba Komandu PNTL Munisípiu Likisá no iha tuku 20:00 kedan situasaun konduzivu to’o agora.
Biban ne’e, Superintendente Polísia apela ba suspeitu sira ne’ebé envolve iha konfrontu atubele entrega-an mai Polísia atu responsabiliza sira-nia aktu, liuliu sira ne’ebé envolve sunu uma no estraga karreta.
“Husu mós ba komunidade atu evita konflitu ne’ebé la nesesáriu, karik buat ruma rezolve ulun malirin, labele iha vítima no estraga sasán sira seluk,” nia fó-hanoin.
Jornalista : Natalino Costa
Editora : Julia Chatarina
