DILI, 26 Janeiru 2026 (TATOLI)—Jogu Grupu C rezulta ekipa Portu Taibessi impata 1-1 ho Coração Football Club (FC), enkuantu Fitun Estudante Lorosa’e (FIEL) FC derrota 0-3 ho Lica-Lica Lemorai iha kompetisaun Tasa Liga Federasaun Futeból Timor-Leste (FFTL) 2025.
Jogu entre ekipa Portu Taibessi realiza ho rezultadu iha parte dahuluk 1-1 iha-ne’ebé ekipa Portu Taibessi lidera uluk golu 1-0 iha minutu 12 ne’ebé prodús husi jogadór Hasan Ramos.
Jogu ne’ebé realiza iha Estádiu Munisipál Dili, Sesta (23/01/2026) ne’e, ramata fahe pontu ba malu hafoin ekipa Coração FC liuhusi jogadór Miguel Barbosa responde golu iha oras estra 45+3.
Notísia relevante: Tasa Liga FFTL, Portu Taibessi preparadu kontra Coração FC
Enkuantu, jogu entre FIEL FC kontra Lica-Lica Lemorai ramata ho skor 0-3 iha-ne’ebé hala’o iha Estádiu Munisipál Dili, Sábadu (24/01/2026), ne’ebé golu ida husi Lica-Lica Lemorai prodús husi jogadór Valdo Correia iha minutu 38 no golu rua seluk enxe husi jogadór Mário Panau iha minutu 29 no 90+3.
Ho rezultadu jogu rua referidu, provizoriamente Lica-Lica Lemorai lidera tabela klasifikasaun Grupu C ho pontu tolu, Portu Taibessi pontu ida (1), Coração FC pontu ida (1) no FIEL iha tabela ikus ho pontu 0.
Jornalista: Natalino Belo
Editór: Xisto Freitas da Piedade
