DILI, 26 Janeiru 2026 (TATOLI)—Reitór Universidade Orientál Timor Lorosa’e (UNITAL), Claudino Ninas Nabais, hateten títulu ne’ebé graduadu sira hetan simboliza kapasidade intelektuál ne’ebé universidade atribui hodi kompete iha futuru.
“Títulu ne’ebé imi hetan simboliza imi-nia kapasidade intelektuál. Nune’e, imi uza ba kompetisaun iha futuru hodi ajuda halo mudansa ba dezenvolvimentu iha Timor-Leste,” Reitór UNITAL dehan asuntu ida-ne’e bainhira hato’o nia diskursu iha ámbitu graduasaun ba graduadu hamutuk 551, iha Sentru Konvensaun Dili (CCD-sigla portugeza), Segunda ne’e.
Notísia relevante: UNITAL gradua finalista 240, Reitór husu kompete iha kampu traballu
Reitór akresenta siénsia ne’ebé graduadu sira hetan iha universidade, mak sai kilat-musan hodi uza ba halo mudansa, entaun títulu ne’ebé iha, la’ós rekoñesimentu hanesan grau akadémiku ida maibé tenke sai feramentu ida-ne’ebé imi uza atu halo mudansa ba moris iha nasaun no sosiedade ida-ne’e.
Iha biban ne’e, Reitór dezafia graduadu sira atu uza matenek ne’ebé universidade atribui ona, hodi kompete iha servisu saida de’it, tantu iha rai-li’ur no rai-laran.
“Universidade depozita konfiansa ba imi ho siénsia ne’ebé imi hetan durante imi-nia estudu iha universidade, atu kompete iha-ne’ebé de’it. Labele subar imi-nia matenek, labele ta’uk ba imi-nia kualidade,” nia hateten.
Nabais dehan kualidade la’ós karakter pesoál ida, maibé kompromisu ida atu hadi’a beibeik to’o hetan atinjimentu ida-ne’ebé di’akliu no kampu servisu mak sei determina ema ida nia kualidade.
Iha fatin hanesan, Ministru Ensinu Superiór, Siénsia no Kultura (MESSK), José Honório da Costa Pereira Jerónimo, informa nia parte apresia ho Reitór UNITAL nia servisu tanba UNITAL kontribui ona graduadu rihun neen-resin ba Timor-Leste.
“Ha’u hanoin ida-ne’e di’ak ba rekursu umanu Timor-Leste nian. Ha’u fiar katak sira-ne’ebé ohin gradua balun servisu ona no balun lae,” Ministru José dehan.
Governante ne’e motiva graduadu sira atu buka servisu no bele kontinua estudu ba mestradu no doutoramentu tanba universidade barak loke hela bolsu estudu.
“Universidade barak mak fó bolsa estudu parsiál ba Timor-Leste. Se hakarak bá eskola Governu fasilita,” nia subliña.
Entretantu, estudante hamutuk 551 mak simu graduasaun kompostu husi programa Mestradu Direitu na’in-rua (2), no Fakuldade Direitu na’in-13, Fakuldade Siénsia Sosiál Polítika na’in-35, Fakuldade Ekonomia na’in-26, Fakuldade Enjeñaria na’in-60, Fakuldade Agrikultura na’in-37, Fakuldade Edukasaun 135 no Fakuldade Siénsia Saúde hamutuk 243. Enkuantu, durante ezisténsia universidade nian, UNITAL rejistu ona graduadu hamutuk 6.662. Husi númeru ne’e, kuaze absolve ona ba kampu traballu.
Jornalista: Osória Marques
Editór: Xisto Freitas da Piedade
