DILI, 26 Janeiru 2026 (TATOLI)—Ministru Ensinu Superiór, Siénsia no Kultura, José Honório da Costa Pereira Jerónimo, informa Ministériu Ensinu Superiór, Siénsia no Kultura (MESSK) simu ona proposta lei ida kona-ba asédiu sexuál husi Universidade Nasionál Timor Lorosa’e, daudaun ne’e iha hela faze diskusaun.
“UNTL submete ona proposta lei kona-ba asédiu sexuál. Ha’u hato’o ba jurista sira atu haree no agora iha ona faze diskusaun. Maibé, ha’u rona Sekretaria Estadu Igualdade sira mós halo hela lei ida-ne’e,” nia dehan ba jornalista sira iha resintu Sentru Konvensaun Dili (CCD-sigla portugeza) Segunda ne’e.
Governante ne’e hatutan parte rua sei haree hamutuk oinsá atu ajusta hamutuk ho proposta UNTL nian.
“Ami sei haree hamutuk. Se sira halo ona ita husu atu ajusta mós ho proposta husi UNTL nian, atubele regula dosente sira,” nia informa.
Notísia relevante: Ministru José Jerónimo solisita reitór foun UNTL tau-atensaun ba problema asédiu sexuál
Tanba, tuir José Honório, problema boot ne’ebé iha Timor-Leste dalabarak sosiedade no akadémiku sira la respeita feto sira.
“Ita-nia sosiedade dalabarak la respeita feto sira, no mós iha kampus profesór balun la respeita estudante feto sira. Ida-ne’e mak problema boot,” nia subliña.
Nia haktuir MESSK estabelese ona akordu ida ho UN WOMEN kona-ba asédiu sexuál, nune’e se profesór sira komete asédiu sexuál, tenke foti sansaun ba nia (profesór) labele hanorin no labele orienta estudante sira.
Ministru José Honório solisita ema hotu atu hateten lae ba asédiu sexuál, tanba atu referidu ladi’ak.
Jornalista: Osória Marques
Editór: Xisto Freitas da Piedade
