DILI, 22 Dezembru 2025 (TATOLI)–Ministru Ensinu Superiór, Siénsia no Kultura, José Honório da Costa Pereira Jerónimo, solisita reitór foun Universidade Nasionál Timor Lorosa’e (UNTL), Joviano António da Costa, atu tau-atensaun másima ba problema asédiu sexuál ne’ebé akontese beibeik iha universidade ne’e.
“Kampus tenke seguru ba estudante no profesór atu hanorin, tanba ne’e husu reitór atuál no reitór eleitu, ba futuru favór ida tau-atensaun ba problema asédiu sexuál, tanba hahalok ida-ne’e ladi’ak. Favór ida respeita labarik feto sira, tanba ne’e ita-nia oan sira,” nia dehan liuhusi diskursu iha serimónia graduasaun UNTL ba da-33, iha Jináziu Dili, Segunda ne’e.
Ministru José Jerónimo esplika UNTL asina ona akordu ho UN Women kona-ba prevensaun asédiu sexuál iha universidade, tan ne’e tenke respeita estudante feto sira.
José Honório mós husu dekanu sira katak se profesór ruma komete asédiu ne’e tenke fó sansaun, lalika hanorin no orienta estudante sira.
“Ita tenke hakerek karta bá Komisaun Funsaun Públika atu halo prosesu, tanba ne’e hanesan funsionáriu publiku. Labele hein. Kuandu hein buat ne’e sei estraga imajen universidade nian,” nia fó-hanoin.
Aleinde ne’e, ministru mós husu xefe departementu sira iha universidade, atu tau oráriu ba dosente sira-ne’ebé atu orienta estudante sira.
Jornalista: Osória Marques
Editór: Xisto Freitas da Piedade
