OEKUSI, 27 Janeiru 2026 (TATOLI) – Komisaun Anti Korupsaun (CAC, sigla portugés), tersa ne’e, hahú halo rejista deklarasaun rikusoin kona-ba rendimentu bens no interrese husi kargu xefia sira ho funsionáriu efeitu iha Rejiaun Administrativa Espesiál Oekusi Ambeno (RAEOA).
Espesialista Komisaun Anti Korupsaun, Belito Marçal, esplika, rejistrasaun deklarasaun rendimentu bens no interrese ne’e, hahú husi jestór sub-rejiaun sira funsionáriu no kargu xefia sira, bazeia ba dekretu-lei númeru 7/2020.
“Ita mai fó asisténsia ba deklarante sira, fokuliu ba kargu xefia sira-ne’ebé anualmente deklara sira-nia rendimentu bens no interrese, inklui funsionáriu sira-ne’ebé lei konsidera serbisu iha área atendimentu públika, hanesan Diresaun Rejionál Transporte Terrestre, álfandega no aprovizionamentu,” nia hateten ba jornalista iha salaun administrasaun Numbei, ohin.
Notísia relevante:CAC rekolla koima $93.321,87 husi infratór aprezenta deklarasaun rikusoin tarde
Tuir nia, ba funsionáriu sira-ne’e konsidera tri-anuál, karik iha anteriór sira halo ona deklarasaun rikusoin iha 2023, entaun iha 2026 ne’e, sira iha obrigasaun atu atualiza fali sira-nia deklarasaun tri-anuál.
Aleinde ne’e mós inklui kargu xefia sira-ne’ebé termina ona mandatu, presiza atualiza sira-nia deklarasaun finál, karik iha anteriormente, sira ramata sira-nia deklarasaun iha fulan-Janeiru 2025, entaun iha Janeiru 2026 ne’e tenke atualiza ezersísiu inklui kargu xefia atuál sira.
“Ne’ebé, dadus rejista ona iha sistema, totál deklarante 272, maibé sira-ne’e la’ós obrigatóriu deklara hotu, tanba balun tri-anuál, balun deklara ona iha tinan kotuk, entaun sei deklara fali iha 2028 ka tinan tolu dala ida, maibé ba kargu xefia sira-ne’e, obrigatoriamente deklara kada tinan,” nia hateten.
Reprezentante CAC ne’e, konfirma, tuir lei, deklarante sira hafoin deklara sira-nia rikusoin, faze tuirmai CAC sei halo verifikasaun ba dadus ne’ebé submete ona, karik iha irregularidade formál ruma, sei notifika hodi kompleta hodi kontinua ba faze ikus auditória.
Iha biban ne’e, Xefe Departamentu Agrikultura Bázika Familiár, Bernardino da Costa Nunes, konsidera rejistu deklarasaun ne’e importante tanba iha lei mós regula ona, kabe ba sidadaun ne’ebé asumi kargu iha instituisaun públika.
“Nu’udar funsionáriu públiku, ida-ne’e importante. Kada tinan, CAC mai halo rejistu kona-ba rikusoin ba pesoál ne’ebé asumi kargu iha diresaun idak-idak, tanba ema hotu tenke rejistu nia rikusoin, saida de’it mak nia iha, fasilidade saida mak nia iha, tenke rejistu, tanba iha lei mós regula ona,” nia hateten.
Notísia relevante:Kargu Xefia 2500 mak seidauk presta rikusoin iha CAC
Jornalista: Abílio Elo Nini
Editór: Rafael Ximenes de A. Belo
