DILI, 27 Janeiru 2026 (TATOLI)–Xefe Estadu Maiór Jenerál Forsa Armada (XEMGFA), Tenente Jenerál Domingos Raul ‘Falur Rate Laek’ fó sai katak Militár hamutuk 13 sei reforma iha tinan ne’e nia laran.
Jenerál Falur hato’o iha ámbitu reflesaun ba loron transformasaun FALINTIL ba FALINTIL-Forsa Defeza Timor-Leste (F-FDTL) ba dala-25.
“Daudaun ne’e sira na’in-13 hato’o ona sira-nia rekerimentu atu pasa ba refoma, ha’u asina ona, hein publika iha Jornál Repúblika para sira ba refoma,” Jenerál Falur hateten ba Jornalista sira iha Kuartel Jenerál F-FDTL, Fatuhada, Tersa ne’e.
Nia esplika, Militár ho idade 55 ka 50 ne’ebé hakarak pasa ba rezerva ne’e bele hatama rekerimentu.
“Agora pasa ba refoma tuir lei ne’e hateten tenke reforma. Maibé iha ne’ebá lei mós hateten kuandu ha’u aprova ona sira-nia rekerimentu entaun ba rezeva, pois mak ba reforma,” nia akresenta.
Notísia relevante : Estabelese regra tranzisaun ba situasaun rezerva no reforma ba militár F-FDTL
Xefe Estadu Maiór dehan, Militár sira ne’ebé hatama rekerimentu hodi pasa ba reforma tanba kestaun idade avansada.
“Sira hirak ne’ebé mak husu atu pasa ba refoma ne’e maioria sira ne’ebé 01, sira hanesan veteranu antigu sira,” nia katak.
Jenerál Falur fundamenta, lista ne’ebé nia parte aprova ona iha Koronél na’in-rua no Alferis ida.
“Koronél na’in-rua mak Sadia no Koronél Amico, Alferis ida mak husu pasa ba reserva no serjentu lubuk oan ida inklui sira seluk ne’e ba reforma,” nia katak.
Falur dehan, reforma ne’e sei implementa iha ámbitu selebrasaun loron transforamasaun FALINTIL ba F-FDTL ba dala-25 iha Munisípiu Aileu.
“Ha’u prosesa ona, imi hein aban ka bainrua sai jornál mak imi hatene. Sira-nia reforma ne’e sei halo serimónia despedida,” nia realsa.
Falur hatutan, Komandu sei la taka matan ba militár na’in-13 ne’ebé pasa ona ba reforma no sei trata sira ho dignu.
“Reforma ne’ebé Estadu liuhusi Komandu F-FDTL halo ba Militár na’in-13 ne’e dignu, tanba Estadu prepara kondisaun hothotu para sira pasa ba refoma,” nia hato’o.
Aleinde ne’e, Estadu garante katak Militár reformadu sira-nia kondisaun mak subsidiáriu ba sira, sira-nia seguransa sosiál, seguransa fízika, inklui sira-nia sobrevivénsia no saúde.
Jornalista : Natalino Costa
Editora : Julia Chatarina
