DILI, 27 Janeiru 2026 (TATOLI)-Deputadu sira iha Parlamentu Nasionál solisita ba Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI, I.P sigla portugés) atu halo normalizasaun urjente ba estrada diresaun Asalaitula bá Builale, iha postu administrativu Ossú, munisípiu Vikeke, no iha suku Lisadila, iha Likísa.
Deputadu Anacleto Freitas husi Partidu Kongresu Nasionál Rekonstrusaun Timorense (CNRT, sigla portugés) haktuir katak iha kontaktu eleitorál iha Ossú rona komunidade sira-nia preokupasaun kona-ba estrada katak bainhira seidauk halo reabilitasaun husi parte Governu presiza normaliza uluk hodi fasilita movimentu komunidade nian, tanba iha tempu udan difikulta tebes sira
“Estrada husi Asalaitula bá Builale agora ne’e karreta ki’ik sira liu la di’ak. IGEADE bele bá aterru”, nia levanta iha reuniaun plenária Parlamentu Nasionál.
Aleinde ne’e, deputada Maria Angelina Sarmento Lopes husi Partidu Libertasaun Populár (PLP) mós hato’o katak iha kontaktu eleitorál foin lalais iha suku Lisadila, munisípiu Likísa, identifika estrada aat tebes no komunidade sira husu ba IGEADE atu lori mákina pezada hodi normaliza estrada.
“Iha suku referidu iha eskola sekundária Filadelfia, bainhira mákina pezada lahalo intervensaun lalais maka bee sei tama no lori eskola bá mota. Espera Governu hola medida urjente hodi atua iha semana ne’e nia laran”, nia hato’o.
Hatán ba preokupasaun ne’e, Prezidente IGEADE, I.P, Ana Paula da Cruz, hateten daudaun ekipa téknika iha hela terrenu hodi halo identifikasaun ba estrada Asalaitula bá Builale, bainhira ninia rezultadu iha mak bele halo normalizasaun, tanba iha mós empreza balun iha ne’ebá.
Aleinde ekipa iha terrenu halo hela serbisu hodi normaliza ponte iha Maubara, Likisá nian ne’ebé impaktu husi mota ki’ikoan sira no atende serbisu intervensaun iha Faularan ne’ebé hotu ona, daudaaun tama bá Lisadila no atinje ona 60%, hein katak ho preokupasaun hirak ne’ebé hato’o sei rezolve hotu iha tempu badak.
Iha reuniaun plenária ne’e, reprezentante povu sira mós levanta preokupasaun komunidade nian bazeia ba kontaktu eleitorál iha baze hodi husu Ezekutivu atu tau atensaun hodi aselera konstrusaun ponte Turon iha Manuhafi, reabilitasaun estrada husi suku Liurai bá to’o Baurusa iha Aileu, projetu muru protesaun iha Mota Laklo Lema iha Likísa, projetu emerjénsia konstrui gabiaun proteje mota iha suku Legimeia, aldeia Hatuleta no reabilitasaun estrada postu Baguia-Baukau.
Notísia relevante: IGEADI halo levantamentu dadus ba ponte Bulobu ne’ebé ameasadu kotu
Jornalista: Nelson de Sousa
Editora: Maria Auxiliadora
