DILI, 27 Janeiru 2026 (TATOLI) – Institutu Jestaun Ekipamentu no Apoia Dezenvolvimentu Infraestrutura, Institutu Públiku (IGEADI, I.P) orienta ona ekipa téknika halo levantamentu dadus ba ponte Bulobu ne’ebé lokaliza iha área Samutaben, suku Manapa, postu administrativu Kailaku, munisípiu Bobonaru, ne’ebé ameasadu kotu tanba kauza husi volume mota boot.
Prezidente IGEADI, Ana Paula da Cruz, dehan ekipa tun terrenu hodi identifika mákina no ekipamentus saida maka presiza uza ba halo normalizasaun ba ponte ne’e.
“Tanba ida-ne’e ita konsidera hanesan emerjénsia, nune’e bainhira dadus iha ona ha’u-nia liman, ha’u sei orienta ekipa brigada destakadu Bobonaru tun hodi halo asaun preventiva ba ponte ne’ebé atu kotu”, dirijente ne’e informa ba Tatoli via telefone, ohin.
Nia sei hato’o mós informasaun ba Ministériu Obra Públika atu haree asuntu ida-ne’e, tanba IGEADI halo ona normalizasaun dala-rua, maibé kondisaun ponte kontinua aat, nune’e presiza iha solusaun permanente ida atu ponte labele kotu.
Iha soron seluk, motorista Camilo dos Santos preokupa ho ponte ne’e, tanba tinan-tinan sempre hetan danus no difikulta tebes movimentasaun públiku.
Notísia relevante: IGEADI normaliza ona estrutura ponte Bulobu iha Kailaku
“Se sira la atende lalais ami bá-mai la di’ak. Kuandu udan mai tan dala-ida ne’e nia kotu liu kedas, okos mamuk tiha ona ne’e, ami hanesan bá-mai ne’e lori barani de’it”, nia dehan.
Camilo rekomenda ba IGEADI Brigada Maria Tapó atu halo intervensaun imediata, tanba kondisaun ponte ne’e falta de’it ona espasu ba kareta ida nian. “Ami-nia vida ameasada. Bailoro ida karik ami bele liu husi mota laran, más tempu udan be boot, hakarak ka lakohi ami tenke liuhusi ponte”, nia afirma.
Administradór Postu Administrativu Kailaku, Rudolfo da Cruz, dehan pedidu normalizasaun ponte ne’e submete ona ba IGEADI.”Ita-nia komunikasaun la’o hela. Ofisiál sira husi IGEADI mai ona postu Kailaku, halo ona indentifikasaun, proposta ne’e sei lori ba diresaun IGEADI nasionál atu konsidera problema sira ne’e”, dehan.
Aleinde ne’e submete mós pedidu ba Autoridade Munisípiu Bobonaru atu buka meiu hodi normalizasaun ponte ki’ik sira ne’ebé hetan danus.
Tuir observasaun jornalista Tatoli, movimentasaun transporte públiku no privada kontinua la’o normál, maski estrutura ponte ne’e hetan presaun maka’as husi bee-mota.
Notísia relevante: Falta metru-ida ponte Bulobu kotu
Jornalista: Sergio da Cruz/Alexandara da Costa
Editora: Maria Auxiliadora
