BOBONARU, 24 Marsu 2024 (TATOLI)-Ponte Bulobu ne’ebé lokaliza iha área Samutaben, Suku Manapa, daudaun ne’e falta de’it metru-ida liu atu haketak-an ho estrada diresaun postu administrativu Kailaku ba postu administrativu Maliana, munisípiu Bobonaru, inklui postu administrativu Hatulia, munisípiu Ermera.
Korente bee-mota estraga estrutura ponte Bulobu, tanba akontese udan-boot iha semana kotuk.
Abitante, Alberto Barreto Borges, hatete movimentu publiku ho de’it karreta-ida sei la’o mesmu hasoru risku.
Notísia Relevante:Ponte Bulobu ligasaun Cailaco-Maliana ameasa atu kotu
Alberto dehan kuandu Estadu la-toma atensaun ho imediata maka sei fó impaktu ba movimentu komunidade Kailaku bá Maliana.
Preokupasaun hanesan hato’o husi Daniel Pereirra Leal. Nia rekomenda ba governu liuhusi Ministériu Obras Públika atu rezolve lalais problema ne’e, tanba ponte ne’e kotu laiha tan dalan alternativa.
“Ami nia ponte ne’e tinan ba tinan ne’e a’at hela de’it, kotu hela de’it, ami husu ba governu tau-matan, tanba ami nia estrada ne’e dalan publiku liga munisípiu Ermera”, dehan nia.
Kuandu ponte ne’e mak kotu, Daniel dehan sei difikulta estudante no komunidade nia viajen.
Hatán ba situasaun ne’e, Diretór Servisu Munisipál Obras Públika, Autoridade Munisípiu Bobonaru, Marselino Gonsalves Godinho, konfirma ekipa tékniku halo ona observasaun iha terrenu iha domingu (23/3) ne’e.
Nia dehan ninia-parte submete kedas pedidu normalizasaun urjénsia ba Institutu Jestaun Ekipamentu Apoia Dezembolvimentu Infraestrutura, Institutu Públiku (IGEADI,IP) atu halo intervensaun imediata.
Tuir nia bainhira intervensaun atraza, ponte ne’e sei kotu totál no automatikamente movimentasaun publiku husi Kailaku bá Maliana paradu.
“Ponte ne’e atu kotu fali ona, ateru ne’ebé tinan uluk IGEADI,IP halo, rai-henek ne’ebé mak enxe iha saku zumbo ida-ne’e agora monu fila-fali, entaun afeta ba ponte atu kotu fali ona, ne’ebé ita espera IGEADI,IP konsidera ita-nia proposta ne’e para halo intervensaun iha tempu badak”, katak nia.
Biban ne’e, Diretór Marselino apela ba komunidade liu-liu motorista sira atu liu ponte ne’e ho kuidadu tanba estrutura rai la-metin.
Alende ne’e mos husu ba komunidade atu hein ho pasiensia tanba estragus ne’e kauza husi natureza.
“Ida ne’e la’os hahalok ema nia, ne’ebé husu ba komunidade mos atu bele kolabora, karik ida ne’ebé ita bele asesu, ita bele buka alternativu ruma, karik laiha ona alternativu ita sei husu ba governu sentrál atu apoia”, konklui.
Ponte ne’e IGEADI, I.P, Brigada Maria-Tapo kada tinan halo normalizasaun, maibé akontese udan-boot ponte ne’e a’at fila fali.
Tuir informasaun ne’ebé TATOLI asesu, Ministeriu Obras Públika foin lalais ne’e kontrata ona kompañia lokál rua atu implementa projetu barajen hodi satán mota, asegura estrutura ponte Bulobu.
Notísia Relevante: IGEADI normaliza ponte Samutaben ligasaun Cailaco-Maliana
Jornalista : Sergio da Cruz
Editora : Rita Almeida
