iklan

EKONOMIA, BOBONARO, HEADLINE, MUNISÍPIU

IGEADI normaliza ponte Samutaben ligasaun Cailaco-Maliana

IGEADI normaliza ponte Samutaben ligasaun Cailaco-Maliana

Ekipamentu pezadu IGEADI, Brigada Maria-Tapo, halo hela normalizasaun ba ponte iha área Samutaben, suku Manapa ligasaun hosi Postu administrativu Cailaco ba postu administrativu Maliana, ne'ebé hetan estragu hosi volume bee-mota Bulobu. Imajen Tatoli/Sérgio da Cruz.

BOBONARO, 22 fevereiru 2024 (TATOLI) – Ekipamentu pezadu hosi Institutu Jestaun Ekipamentu Apoia Dezenvolvimentu Infraestrutura, Institutu Públiku (IGEADI, sigla portugés), Brigada Maria-Tapo, kinta ne’e halo ona normalizasaun ba ponte iha área Samutaben, suku Manapa, ligasaun hosi postu administrativu Cailaco ba postu administrativu Maliana, ne’ebé hetan estragus hosi volume bee mota-Bulobu hafoin akontese udan-boot durante ne’e.

Daudaun ne’e mákina unidade lima ne’e ateru hela rai  iha mota-laran atu sa tán volume bee labele fó amesa bebeik ba estrutura ponte refere no tuir planu sesta ne’e ekipa IGEADI sei hatama fatuk no rai-henek ba jumbo laran, nune’e iha loron sábadu no domingu movimentasaun públiku bele la’o normál.

Normalizasaun ne’e nu’udar intervensaun emerjénsia ba daruak nian atubele fasilita transporte públiku no privada bele asesu ba mai ho seguru.

Administrador postu administrativu Cailaco, Rodolfo da Cruz, agradese ba governu liuhosi IGEADI tanba bele responde sira-nia pedidu molok ponte refere kotu totál.

Notísia Relevante:DSMOP sei hatutan pedidu bá MOP rezolve ponte Cailaco-Maliana

“Horisehik hetan ona aprovasaun iha nasionál, ohin komesa ona halo servisu, ne’ebé ami hanesan autoridade lokál agradese, kontenti ho ekipamentu ne’ebé mak mai atu núne’e bele fasilita ita-nia transporte públiku ba-mai, liuliu komunidade sira bele lori sira-nia produtu lokál ba merkadu Maliana no bele mos ba munisípiu Ermera no Dili,” nia informa ba jornalista sira iha terrenu.

Motorista Manuél Fernandes, senté kontente tanba ho prezensa IGEADI bele fasilita transporte públiku no privada halo movimentasaun hosi diresaun Maliana ba Cailaco.

“Sira seidauk mai ne’e ami sente araska, ami-nia atividade paradu, ami atu liu mos sei ragu-ragu, tanba ta’uk rai halai ho karreta,” nia hateten.

Enkuantu mákina ne’ebé halo intervensaun ba ponte refere hamutuk unidade lima kompostu hosi eskavadór tolu, loader ida no duldozer ida.

Notísia relevante: Ponte ligasaun Cailaco ba Maliana kotu

Jornalista       : Sérgio da Cruz
Editór             : Evaristo Soares Martins

iklan
iklan

Leave a Reply

iklan
error: Content is protected !!